‘हात्तीछाप’ पोस्टर: कस्को बन्धकमा परे दयाहाङ र उपासना ?

इटहरी/ पछिल्लो समय चल्तिका अभिनेता मानिएका दयाहाङ राईको एकपछी अर्को फिल्म छायांकनमा छ भने उनको फिल्म प्रदर्शनसंगै प्रोमोसनका कन्टेन्टहरु समेत सार्वजनिक भैरहेका छन् । यसक्रममा दयाको अभिनय रहेको फिल्म ‘हात्तीछाप’को पोस्टर सार्वजनिक भएको छ । उनीसंगै पोस्टरमा अभिनेत्री उपासना सिंह ठकुरीलाई समेत फिचर्ड गरिएको छ । आइतबार सार्वजनिक पोस्टरमा दुवैलाई बाँधेर कोठाभित्र बन्धक बनाइएको अवस्थामा देख्न सकिन्छ ।

सिमोस सुनुवारको निर्देशन रहेको यो फिल्म ‘हात्तीछाप’को अघिल्लो हप्ता अभिनेता सौगात मल्ललाई फिचर्ड गर्दै पहिलो पोस्टर सार्वजनिक गरिएको थियो । प्रदीप भारद्वाजको लेखन तथा किरण नेपाली प्रस्तुतकर्ता रहेको फिल्ममा दयाहाङ, उपासना, सौगातसंगै विल्सन विक्रम राई, बेनिशा हलमा, बुद्दि तामाङ, बिजय बराल, कमलमणि नेपाल, पुष्कर गुरुङ, प्रकाश घिमिरे, भोलाराज सापकोटा, बिनोद न्यौपाने, कबिता आले, सुष्मा निरौला, रीयर राई, अनुप न्यौपाने, स्वस्तिका खड्का, नारायण खाती, अनिता गिरी, बेन भुजेललगायतको अभिनय रहेको छ ।

यो फिल्म ‘हात्तीछाप’ फिल्मको कार्यकारी निर्माता सरोज नेपाली हुन् भने पुष्कर गुरुङ र अमला देवी राई निर्माताको रुपमा रहेका छन् । सुशान्त प्रजापतिको छायांकन रहेको फिल्म आगामी माघको २६ गते सार्वजनिक प्रदर्शनमा आउँदै छ । गएको वर्ष प्रदर्शनमा आएको ‘दुई नम्बरी’पछि सौगात, उपासना र दयाहाङ यहि फिल्ममा एकसाथ देखिदैछन् ।