मेयर हर्क साम्पाङले गरे आफ्नै बारेमा बन्ने वृतचित्रको क्ल्याप हानेर शुभमुहूर्त (भिडियो सहित)

इटहरी/ धरानका मेयर हर्क साम्पाङको बारे वृतचित्र निर्माण हुने भएको छ । नेपाल चलचित्रकर्मी महासंघ प्रदेश १ का अध्यक्ष तथा नेपाल चलचित्र निर्देशक समाजका केन्द्रिय महासचिव समेत रहेका चलचित्र निर्देशक अरुण कुमार प्रधानले उक्त वृतचित्र निर्माण गर्न लागेका हुन् । शनिबार कोकाहा खोलाको डाँडामा धरानका मेयर हर्क साम्पाङले आफ्नै बारेमा बन्ने वृतचित्रको क्ल्याप हानेर शुभारम्भ गरे । वृतचित्रमा हर्कले थालनी गरेको श्रम क्रान्तिलाई समावेश गरिनेछ भने उनको यो अभियानलाई अझै बिस्तारित गर्न उक्त वृतचित्र विभिन्न फेस्टिभलहरुमा पठाउने निर्माता तथा निर्देशक प्रधानको योजना रहेको छ । यतिबेला कोकाहा खोलाबाट धरानेहरुलाई पानी खुवाउने अभियानमा मेयर साम्पाङ जुटिरहेका छन् । हेर्नुस भिडियो

सोही अवसरमा देशभरका जनताले आर्थिक सहयोग तथा सम्बन्धित ठाउमै पुगेर श्रमदान गरिरहेका छन् । वृतचित्र निर्माता तथा निर्देशक प्रधान समेत केही चलचित्रकर्मीहरु सहित कोकाहा खोलामा श्रमदान गर्न पुगेका थिए । उनले ४० केजिको पाईप २ जनाले बोकेर झण्डै १० किलोमीटरको भिरको बाटोमा हिडेको अनुभव सुनाए । आफ्नो तर्फबाट श्रमदान पश्चात् उनले साम्पाङको हातबाट आफुले बनाउने वृतचित्रको शुभमुहूर्त गरेका हुन् । शुभमुहूर्त पछि त्यहाँको गतिविधिहरुलाई वृतचित्रमा राख्नको लागी छायांकन समेत गरिएको थियो ।

प्रधानका अनुसार यो वृतचित्र निर्माणमा लाग्ने सम्पुर्ण खर्च सबै आफैले बेहोर्नेछन् । यो संगै कोकाहा खोला खानेपानी अभियानलाई सहयोग पुर्याउन उनले निर्माण तथा निर्देशन गरेको ‘१२ नेपाली १ चिहान’ फिल्मको धरानमा च्यारिटी शोको आयोजना समेत गरिने उनले बताएका छन् । आउँदो २०८० को बैशाख अन्तिममा फिल्मको च्यारिटी गरि त्यहाँबाट उठेको रकम कोकाहा खोला खानेपानी अभियानलाई सहयोग गर्ने डिथ्री अनलाइनसंगको कुराकानीमा प्रधानले बताए । धरानका मेयर हर्क साम्पाङ यतिबेला देश तथा बिदेशमा लोकप्रिय छन् । पदिय हैकम भन्दा जनताको स्थानबाट आफ्नो सेवालाई पर्वाह गर्दै आइरहेका साम्पाङको लोकप्रियताका कारण अन्य जनप्रतिनिधिहरु सचेत हुन थालेका छन् ।