यो शुक्रवारबाट प्रदर्शन हुने फिल्म ‘एक भगवत र एक गीता’ को ‘झिजिया’ गीत सार्वजनिक

इटहरी/यहि भदौ २९ गतेबाट प्रदर्शनमा आउन लागेको सिनेमा ‘एक भागवत र एक गीता’ (सामाजिक कथा)को मैथिली भाषाको गीत सार्वजनिक भएको छ । सार्वजनिक गरिएको ‘झिझिया’ बोलको गीतमा नेहा प्रियदर्शनी र प्रवेश मलिकको युगल स्वर रहेको छ भने उनले आफै नै संगीत दिएका हुन् । मंगलबार गीत मैथिली समुदायको परम्परागत गीत हो । यसले मैथिली संस्कृति र जीवन बोल्छ ।

मैथिली समुदायमा दुर्गा पूजाको अवसरमा यो गीतमा नृत्य गर्ने प्रचलन छ । त्यही गीतलाई नयाँ शैलीमा तयार गरेर सिनेमामा समावेश गरिएको छ । जानकी मन्दिरको परिसरमा छायांकन गरिएको गीतमा अभिनेत्री सुहाना थापा नृत्य गर्दै प्रस्तुत छिन् भने अभिनेता विपिन कार्की र बालकलाकार जेभिन र जेभिस श्रेष्ठलाई ‘ट्रान्सजेन्डर’ लुक्समा देख्न सकिन्छ । ओझेल परेको मैथली पारम्परिक गीत पुनः एक पल्ट यस फिल्म मार्फत सबै माझ उजागर भएको छ । यो गीतबाट नेपालमा बिभिन्न परम्परालाई नया पिढीमा जोगाउनु पर्ने संदेश दिएको छ ।

विपिनले पहिलो पटक सिनेमामा ‘ट्रान्सजेन्डर’को भूमिका निर्वाह गरेका हुन् । दर्शकमा पनि उनको भूमिकालाई लिएर कौतुहलता देखिन्छ । झरना थापा निर्देशित सिनेमामा विपिन कार्की, धिरज मगर, सुहाना थापा, कबीर खड्का, जेविस र जेविन श्रेष्ठ, संजोग रसाइली, मुकेश झा, अनुराग कुँवर, राम कैलाश ठाकुर, धिरज ठाकुरको पनि अभिनय छ । सुनिल कुमार थापाको निर्माण रहेको सिनेमाको कन्सेप्ट अभिनेत्री सुहाना थापा र कथा निर्देशक झरना थापाको हो । भिडियो हेर्नुहोस् ।

झरनासँगै सरिन पोखरेल, परिक्षेद सेन, पुरुषोत्तम ढंगेल र कृष्णको पटकथा रहेको सिनेमामा परिक्षेद र पुरुषोत्तमले संवाद लेखेका छन् । सुहाना इन्टरटेनमेन्ट र सुनिल कुमार थापा प्रोडक्सनको व्यानरमा निर्माण भएको सिनेमामा राजेश श्रेष्ठको छायांकन, मित्र डि गुरुङको सम्पादन, हिमाल केसीको द्वन्द्व, कविराज गहतराजको कोरियोग्राफी तथा शैलेश श्रेष्ठको ब्याकग्राउण्ड स्कोर, हर्कुलस बस्नेत, आशिष अविरल, प्रवेश मल्लिक र बाबुल गिरीको संगीत तथा शंकर अधिकारी घायलको शब्द रचना रहेको छ ।