युट्युबमा विपिन र सुहानालाई पछ्याउँदै दया र मिरुना, भदौ २९ मा कस्ले मार्ला बाजी ?

इटहरी/ नेपाली फिल्म ‘एक भगवत् र एक गीता’ र ‘नाङ्गो गाउँ’ प्रदर्शनको नजिक आइसकेको छ । तर, यता ‘एक भगवत् र एक गीता’ को नाम विवाद भएपछि भने निर्माण युनिटलाई तनाब भएको थियो । अहिले सो तनाब टुङ्गो लागेसंगै फिल्मले युनिभर्सल सर्टिफिकेट पनि पाईसकेको छ । यता युट्युब हेर्ने हो भने यतिबेला यो फिल्मको ट्रेलर हेर्नेहरुको संख्या उल्लेख्य छ । यो फिल्मको ट्रेलरले युट्युब ट्रेन्डिङको मुभी क्याटोगरीको दोश्रो स्थान कब्जा गरिरहेको छ भने ‘एक भगवत् र एक गीता’लाई ‘नाङ्गो गाउँ’ ले पछ्याई रहेको छ ।

ट्रेन्डिङको पहिलो नम्बरमा भने हाल प्रदर्शनरत साहरुख खान अभिनित बलिउड फिल्म ‘जवान’को ट्रेलर रहेको छ । दोश्रो नम्बरमा रहेको ‘एक भगवत् र एक गीता’लाई ११ दिनको अवधिमा ८ लाख बढी पटक हेरिएको छ । झरना थापा निर्देशित यो फिल्मलाई सुनिल कुमार थापाले निर्माण गरेका हुन् भने विपिन कार्की, सुहाना थापा, धिरज मगर लगायतको अभिनय यो फिल्ममा रहेको छ । यता, ३ साताअघि सार्वजनिक भएको फिल्म ‘नाङ्गो गाउँ’को ट्रेलरलाई भने १२ लाखभन्दा बढीपटक हेरिएको छ ।

दिपेन्द्र लामाले निर्देशन गरेको नाङ्गो गाउँ फिल्मको निर्माता जय श्रेष्ठ हुन् । फिल्ममा दयाहाङ राई, मिरुना मगर, साम्राज्ञि राज्यलक्ष्मी शाह, कर्मा लगायत कलाकारहरूको अभिनय रहेको छ । दुबै फिल्म एकसाथ प्रदर्शन हुँदा ब्यवसायिक धक्का लाग्ने देखिन्छ । सुस्ताएको साउनलाई भदौले उकास्छ भन्ने आश गरिएको थियो । भदौमा यसअघि सार्वजनिक प्रदर्शन भएका फिल्महरुले अपेक्षाकृत व्यापार गर्न सकेन । अब ब्यापारिक रुपमा सम्भावना बोकेको यहि ‘एक भगवत् र एक गीता’ र ‘नाङ्गो गाउँ’ हो । तर, एकसाथ जुध्दा भने त्यो सम्भावना पनि नरहने हो कि भन्ने संका उब्जिएको छ ।