दोश्रो पटक पनि एअरपोर्टबाट फर्किएका थिए किरण गजमेर, यस्तो छ एम्बुलेन्स ढिला दिनुको कारण

इटहरी/ भ्वाइस अफ नेपाल सिजन ३ का विजेता किरण गजमेरले विजेता हुँदैगर्दा घोषणा गरेको २ ओटा एम्बुलेन्स अझै दिएका छैनन् । उनलाई अहिलेसम्म किन एम्बुलेन्स नदिएको भन्ने प्रश्नले आजित बनाईसकेको छ । घोषणा गरेको २ वर्ष बितिसक्दा पनि एम्बुलेन्स दिन नसक्नुमा आफुलाई नराम्रो लागेको बताएका छन् । उनले बिजेता भएबापत पाएको पुरस्कार रकमले दमक अवस्थित बेलडाँगीमा रहेको शरणार्थी शिविर र पथरीमा रहेको शरणार्थी शिविरका लागी उक्त एम्बुलेन्स दिने घोषणा गरेका थिए । एउटा एम्बुलेन्स उनले बिजेता बापत पाएको रकम र अर्को इन्ट्रा फाउन्डेसनको तर्फबाट दिइने घोषणा गरिएको थियो ।

हालै उनले परिकला न्युजमा गरिएको भिडियो कुराकानीमा यसबारे बताएका छन् । आफुले बिजेताबाट पाएको रकम एम्बुलेन्स खरिद गर्नका लागी भनेर इन्ट्रा फाउन्डेसनलाई पहिले नै दिइसकेको बताए । किरणका अनुसार शरणार्थी भएका कारण नेपालमा बोल्ने बित्तिकै समाजसेवा गर्न पनि सहज नभएको दुखेसो पोखे । पैसा भएर मात्रै नहुने उनको तर्क छ । हेर्नुस् उनीसंग गरिएको भिडियो कुराकानी:

आफू देखिने र नदेखिने ठाउँमा पनि एम्बुलेन्स नदिइएको बारे प्रश्न उठ्ने गरेको बताउँदै उनले पहिले नै एम्बुलेन्स खरिदको प्रक्रिया माथिल्लो चरणमा पुगिसकेको थियो तर राजनैतिक अस्थिरता र सरकार परिवर्तनका कारण उक्त प्रक्रिया रद्ध भयो । र पुनः नयाँ प्रक्रियाबाट जानुपर्ने बाध्यताका कारण ढिलाई भएको किरणले बताए ।

यहि कामका लागी नेपाल आउँदा एअरपोर्टबाट फर्किएको एकपटक मात्रै समाचार आयो । तर, त्यसपछि पनि आउँदा विभिन्न मन्त्रालयले दुख दिएको उनको भनाई छ । उनले मन्त्रालयको नाम लिन चाहेनन्, तर, उक्त मन्त्रालयहरुले चिट्ठि लेखेरै आउनको लागी सहज बनाईदिने र काम गर्न सक्ने आश्वासन दिइएर आफु आउँदा दोश्रो पटक पनि एअरपोर्टबाट फर्किएको तितो यथार्थ सुनाए । विविध कारणवश ढिलो भएपनी अब केही महिनाभित्रै एम्बुलेन्स हस्तान्तरण गर्ने उनले कुराकानीको क्रममा जानकारी गराएका छन् ।