विराज भट्ट भन्छन्- ‘राम नाम सत्य २’ को केही दृश्यहरू छायांकन भइसक्यो

इटहरी/ आजबाट देशभर प्रदर्शनमा आएको बहुप्रतिक्षित फिल्म ‘राम नाम सत्य’ले दर्शकबाट उत्कृष्ट प्रतिक्रिया पाइरहेको छ । रिलिजको पहिलो दिनमै हलमा पुगेका दर्शकको उत्साहजनक साथ देखेर हौसिएका फिल्मका प्रमुख अभिनेता विराज भट्टले यसको दोस्रो भाग निर्माण हुने बताएका छन् । दर्शकको प्रतिक्रिया बुझ्न फिल्म हल पुगेका अभिनेता भट्टले सञ्चारकर्मीहरूसँग कुराकानी गर्दै ‘राम नाम सत्य २’ को केही दृश्यहरूको छायांकन समेत सम्पन्न भइसकेको ‘सरप्राइज’ खुलासा गरेका हुन् ।

पहिलो दिनको सुखद ओपनिङ र चौतर्फी सकारात्मक प्रतिक्रियाले फिल्म युनिटलाई थप उत्साहित बनाएको छ । माइकल इन्टरटेन्मेन्ट हाउसको ब्यानरमा निर्माण भएको यस फिल्मलाई माइकल चन्दले निर्देशन गरेका हुन् । फिल्मको कथा र पटकथा पनि निर्देशक चन्दकै रहेको छ । लभस्टोरी, सस्पेन्स, पारिवारिक सम्बन्ध र दमदार एक्सनको पूर्ण प्याकेज रहेको यो फिल्मले दर्शकलाई हलमा भरपुर मनोरञ्जन दिइरहेको छ ।

फिल्ममा एक्सन स्टार विराज भट्ट र नव-नायिका खुशी कार्कीका साथै नेपाली फिल्म क्षेत्रका दिग्गज तथा लोकप्रिय कलाकारहरू सुनिल थापा, प्रशान्त ताम्राकार, सुशील श्रेष्ठ, सुपुष्पा भट्ट, दिव्या रायमाझी र आयुष सिंह ठकुरीको सशक्त अभिनय यसमा देख्न सकिन्छ । यस प्रोजेक्टलाई सफल बनाउन प्राविधिक तथा निर्माण पक्षको पनि बलियो साथ रहेको छ । फिल्मको निर्मातामा उपेन्द्र शाही र स्वेता बिमली रहेका छन् भने कार्यकारी निर्मातामा किशोर भट्ट, राजेन्द्र भट्ट र अर्जुन सुनार छन् ।

यस्तै क्रियटिभ प्रोड्युसर मोती कार्की, लाइन प्रोड्युसर राजेन्द्र आचार्य रहेको फिल्मको छायांकन मानकृष्ण महर्जन, एक्सन श्री श्रेष्ठ र सम्पादन सम्पादन बन्दे प्रसादले गरेका छन् । फिल्ममा बाबुल गिरी, अर्जुन पोखरेल, एसडी योगी र ओम स्पार्कको संगीत रहेको छ । दमदार स्टारकास्ट, सुमधुर संगीत र उत्कृष्ट कथावस्तुले सजिएको ‘राम नाम सत्य’ को पहिलो दिनको सुखद सुरुवात हेर्दा यसले बक्स अफिसमा सानदार व्यापार गर्दै दर्शकको मन जित्ने विश्वास गरिएको छ ।