पुष्प श्रेष्ठको संयोजकत्वमा कलाकार संघको कोशी प्रदेश शाखा विस्तार

इटहरी/ नेपाली चलचित्र क्षेत्रका गतिविधिहरु पछिल्लो समय कोशी प्रदेशमा व्यापक हुँदै गैरहेको छ । फिल्मका छायांकनदेखी प्रोमोसन गर्न फिल्मकर्मीहरु आउने तथा फिल्म क्षेत्रसंग सम्बन्धीत विविध गतिविधि तथा कार्यक्रमहरु बाक्लिदो क्रममा छ । यस्तैमा यहाँका कलाकारहरूको हकहितका लागि भन्दै विभिन्न कलाकर्मीको संगठनहरु पनि बनेका छन् ।

यस्तैमा पुनः अर्को एक संगठनको शाखा विस्तार भएको छ । काठमाडौमा स्थापना भएर लामो समयदेखि कलाकारहरूको दु:ख सुखमा साथ दिदै आएको नेपाल चलचित्र कलाकार संघको कोशी प्रदेश शाखा विस्तार भएको हो । संघका तर्फबाट महासचिव सविन श्रेष्ठले सोमवार एक वक्तव्य जारी गर्दै अग्रज कलाकार पुष्प श्रेष्ठको संयोजकत्वमा कोशी प्रदेश शाखा विस्तार गरेको हो ।

शाखा संयोजक श्रेष्ठ संघको केन्द्रिय कार्यसमिति सदस्यसमेत हुन् । शाखाको सह-संयोजकमा पुरुषोत्तम कोईराला (दिनेश) रहेका छन् । उनी नेपाल चलचित्रकर्मी महासंघ कोशी प्रदेशको महासचिव समेत हुन् । यस्तै सदस्यहरुमा हिमाल दहाल, गोपाल याक्तेन(मेघराज), माधव के.सि., मेनुका माझी, रितेश जंग खत्री (पौडेल) चयन भएका छन् ।