झापामा सुटिङ भइरहेको फिल्म ‘पाँच पाण्डव’मा इभा गिरीको इन्ट्री

इटहरी/ कोशी प्रदेशको झापामा विगत दुई सातादेखि छायांकन भइरहेको प्रतिक्षित फिल्म ‘पाँच पाण्डव’ को टोलीमा थप दुई नयाँ अनुहार जोडिएका छन् । काली रानी फिल्मस्को ब्यानरमा निर्माण भइरहेको यस फिल्मको सेटमा १४औं दिनदेखि भर्सटायल अभिनेता प्रशान्त ताम्राकार र चर्चित कन्टेन्ट क्रिएटर तथा मोडल इभा गिरी भित्रिएका हुन् । निर्देशक वसन्त निरौलाका अनुसार यी दुई कलाकारको प्रवेशसँगै फिल्मको क्यानभास थप फराकिलो र आकर्षक बनेको छ । फिल्ममा उनको जोडी को रहने वा उनको चरित्र कस्तो हुनेछ भन्ने बारे भने खुलाईएको छैन ।

दिग्गजदेखि नयाँ पुस्ताका चर्चित कलाकारहरूको संगम रहेको यस फिल्मका मुख्य पात्रहरूमा हरिवंश आचार्य, जितु नेपाल, आर्यन सिग्देल, महेश त्रिपाठी र सागर लम्साल (बले) रहेका छन् भने दीपाश्री निरौला र जनी गुरुङको पनि प्रमुख भूमिकामा अभिनय रहेको छ । फिल्मको नाम ‘पाँच पाण्डव’ राखिए पनि यो कुनै धार्मिक वा पौराणिक कथामा आधारित छैन । लेखक सुशील पौडेलका अनुसार यो विशुद्ध ‘सोसल ड्रामा’ हो । यसमा महाभारतका पाँच पाण्डवको चरित्र र बिम्बलाई समकालीन नेपाली समाजको यथार्थसँग जोडेर प्रस्तुत गरिनेछ ।

फिल्मको कथा, पटकथा र संवाद पौडेलले नै तयार पारेका हुन् । गत वर्ष ‘लाज शरणम्’ निर्माण गरेका प्रस्तुतकर्ता नवीन श्रेष्ठले यस फिल्मलाई भव्य बनाउन बजेटमा कुनै सम्झौता नगरिएको बताएका छन् । दिग्गज कलाकारहरूको उपस्थिति र बलियो कथावस्तुले गर्दा यो यस वर्षकै प्रतिक्षित फिल्म बन्नेमा निर्माण पक्ष विश्वस्त छ । फिल्मको निर्माण काली रानी श्रेष्ठले गरिरहेकी छन् । गत चैत २ गते नेपाल-भारत सीमावर्ती सहर काँकडभिट्टामा शुभमुहूर्त गरी सुरु भएको छायांकन ४० दिनसम्म चल्नेछ ।

झापाका रमणीय स्थानहरूमा अधिकांश दृश्य खिचिएपछि टोली अन्य स्थानतर्फ लाग्नेछ । फिल्मलाई श्याम तामाङले छायांकन गरिरहेका छन् । प्राविधिक रूपमा पनि उत्कृष्ट बनाउन फिल्ममा ‘फुल डल्बी एट्मस’ साउन्डको प्रयोग गरिनेछ । यसको साउन्ड डिजाइन र मिक्सिङ म्युजिक नेपालको अत्याधुनिक डल्बी एट्मस साउन्ड स्टुडियोमा हुनेछ । ठूलो लगानी, बलियो स्टारकास्ट र अत्याधुनिक प्रविधिको प्रयोगले गर्दा ‘पाँच पाण्डव’ ले नेपाली फिल्म वृत्तमा अहिलेदेखि नै निकै चर्चा बटुलिरहेको छ ।