अशोक दर्जीलाई ८ वर्षको अभिभावकत्वपछि टंक बुढाथोकीले परिवारको जिम्मामा सुम्पिए

इटहरी/ बालगायक अशोक दर्जी र संगीतकार टंक बुढाथोकीको सम्बन्ध केवल एउटा गायक र सर्जकको मात्र थिएन, यो त एउटा पिता र पुत्रतुल्य गहिरो आत्मीयता थियो । तर, समयको चक्रसँगै हिजो सानो रहेका अशोक अब हुर्किएर सक्षम भएका छन् । विगत ८ वर्षदेखि आफ्नै घरमा राखेर शिक्षा, संस्कार र सांगीतिक ज्ञान भरेका टंकले निकै भावुक हुँदै अशोकलाई उनकै परिवारको जिम्मामा सुम्पेको सुखद् तर मार्मिक घोषणा गरेका छन् ।

सामाजिक सञ्जालमा एक भावपूर्ण स्ट्याटस लेख्दै बुढाथोकीले एउटा अभिभावकको रूपमा आफूले पाएको जिम्मेवारी पूरा गरेको सन्तोष व्यक्त गरेका छन् । “अशोक बाबु अब आफ्नै परिवारको निर्णयअनुसार, जिम्मेवारीसहित आफ्नो भविष्य र परिवारका लागि अगाडि बढ्न सक्षम भएका छन्,” उनले खुसी साट्दै लेखेका छन् । सामान्य अवस्थाबाट स्टारडमको शिखरसम्म पुर्‍याउने क्रममा टंकले अशोकलाई कहिल्यै अभिभावकत्वको कमी महसुस हुन दिएनन् ।

आफ्ना विगतका दिनहरू सम्झिँदै उनले लेखेका छन्, “८ वर्षसम्म आफ्नै साथमा राखेर, अशोकलाई ‘हिरो’सम्म बन्ने हौसला, शिक्षा र मार्गदर्शन दिने क्रममा एक अभिभावकले निभाउनुपर्ने कर्तव्यमा सकेसम्म कुनै कमी हुन दिइनँ जस्तो लाग्छ ।” प्राप्त जानकारीअनुसार, विगत ३–४ महिनादेखि अशोक आफ्नै परिवारसँग झापास्थित घरमा बस्दै आएका छन् । टंकको घरबाट अशोकको यो बिदाइ एउटा भौतिक दूरी मात्र हो । मनको सामीप्य र सांगीतिक सहयात्रा भने निरन्तर रहने टंकले प्रस्ट पारेका छन् । “अशोक बाबुलाई मैले गर्न सक्ने सांगीतिक सहयोग सधैं भइरहनेछ,” उनले प्रतिबद्धता जनाएका छन् ।

साथै, सम्पूर्ण संगीतकर्मीलाई अशोकको आगामी यात्रामा सधैं झैं माया र साथ दिन उनले अपिल समेत गरेका छन् । यस भावुक घडीमा टंकले आफ्नो परिवारलाई पनि सम्झिएका छन् । अशोकलाई आफ्नै सन्तान र दाजुभाइ झैं माया दिने श्रीमती विष्णु र छोरा ए.आर. बुढाथोकीलाई उनले विशेष धन्यवाद दिएका छन् । एउटा सानो बालकलाई सक्षम बनाएर आफ्नै परिवारको जिम्मेवारी उठाउन सक्ने गरी बिदाइ गर्दा टंकका शब्दहरूमा जति खुसी झल्किन्छ, त्योभन्दा बढी एउटा असल अभिभावकको गहिरो सन्तोष लुकेको आभास हुन्छ ।