‘सारङ्गी’ को उचाइ र ‘अभिमन्यु’को झड्काबीच ‘रोल नं. १’: निर्माता विनोद पौडेल किन मौन ?

इटहरी/ नेपाली फिल्म बजारमा यतिबेला एउटा फिल्मलाई लिएर सन्नाटा छाएको छ, त्यो हो- सेभेन सिज सिनेमाको आगामी प्रोजेक्ट ‘रोल नं. १’ । घोषणाअनुसार यो फिल्म आगामी २०८३ सालको जेठ १५ गते हलमा आउनुपर्ने हो । तर, रिलिज मिति नजिकिँदै गर्दा निर्माण पक्ष यति मौन छ कि बजारमा फिल्मको एउटा थिम पोस्टर बाहेक न कुनै टिजर, न त प्रचारप्रसारको सामान्य सुइँको नै । डिजिटल युगमा फिल्म रिलिज हुनु महिनौं अघिदेखि ‘हाइप’ निर्माण गर्नुपर्ने प्रचलन चलिरहेको हुन्छ, निर्माता विनोद पौडेल र सेभेन सिजको यो मौनताले फिल्म वृत्तमा ठूलो तरंग र शंका उब्जाएको छ ।

के यो कुनै ‘सरप्राइज’ दिने चतुर मार्केटिङ रणनीति हो ? वा, फिल्मको पोस्ट-प्रोडक्सन नसकिएर भित्रभित्रै रिलिज मिति सार्ने तयारी भइरहेको छ ? अथवा अभिमन्युको फ्लप ट्यागले उनी प्रचारप्रसारका लागि थाके ? उनले पछिल्ला अन्य फिल्मको प्रचारप्रसारहरुलाई पनि नियालिरहेका छन् र ती फिल्महरुको नतिजा उनले प्रत्यक्ष देखिरहेका छन् । यिनै कारणहरुले उनी शान्त भएका हुन् त ? यो शंका त्यसै उब्जिएको होइन, यसको पछाडि सेभेन सिज सिनेमाले भोगेको ‘फ्लप-ब्लकबस्टर-फ्लप’ को अनौठो र डरलाग्दो यात्रा लुकेको छ ।

विनोद पौडेलको बक्स अफिस यात्रा कुनै सस्पेन्स-थ्रिलर फिल्मभन्दा कम छैन । सुरुवातमा ठूलो आश र दाबीसहित ‘अगस्त्य’ हलमा आयो, तर दर्शकले पत्याएनन्- फिल्म नराम्रोसँग फ्लप भयो । त्यसपछि आयो ‘पूर्णबहादुरको सारङ्गी’, जसले बक्स अफिसमा यस्तो आँधी ल्यायो कि नेपाली फिल्म उद्योगकै इतिहासका पानाहरू पल्टिए र नयाँ लेखिए । ब्लकबस्टर व्यापारसहित यसले निर्माताको साखलाई ह्वात्तै माथि पुर्‍यायो र दर्शकको मनमा गहिरो छाप छोड्यो ।

@parikalanewsofficial

तर, ‘सारङ्गी’को त्यो जादुमय धुनको ह्याङओभर उत्रिन नपाउँदै रिलिज भएको ‘अभिमन्यु’ ले फेरि निर्मातालाई नराम्ररी पछारिदियो । अचम्म त के भने, निर्माण पक्षले ४-४ पटकसम्म रिलिज मिति सार्दै, अनेकन् हण्डर र प्राविधिक झमेला खाएर बल्लबल्ल हलमा ल्याएको ‘अभिमन्यु’लाई दर्शकले पूरै नकार्दै फ्लपको ट्याग भिराइदिए । ‘अभिमन्यु’ निर्माणको दौरान पटक-पटक मिति सर्दा जुन प्रकारको अन्योलता र नकारात्मक असर परेको थियो, अहिले ‘रोल नं. १’ को मौनताले त्यही पुरानो घाउलाई कोट्याइदिएको छ । ‘अभिमन्यु’ ४ पटक सरेको रेकर्ड हेर्दा ‘रोल नं. १’ पनि समयमै अर्थात् जेठ १५ मै आउँछ भन्नेमा दर्शक, समीक्षक र हल सञ्चालकहरू विश्वस्त हुन सकेका छैनन् ।

यो उतारचढावले एउटा कुरा घामजस्तै छर्लङ्ग पारेको छ, नेपाली दर्शक अब केवल स्टारकास्ट, सस्तो एक्सन र खोक्रो ग्ल्यामरमा भुल्दैनन् । उनीहरूलाई माटो सुहाउँदो कथा र मुटु छुने ‘भावनात्मक कनेक्सन’ चाहिन्छ, जुन ‘सारङ्गी’ले दियो तर ‘अगस्त्य’ र ‘अभिमन्यु’ले दिन सकेनन् । अब ‘सारङ्गी’ले बनाएको विशाल साख र ‘अभिमन्यु’ले खसालेको ग्राफको ठीक बीचमा उभिएको छ- ‘रोल नं. १’ । एकातिर यसले अघिल्लो फ्लपको दाग मेटाउनुपर्नेछ भने अर्कोतिर ‘सारङ्गी’ले खडा गरेको उच्च मापदण्डलाई छुनुपर्नेछ । तर, अहिलेसम्म प्रचारका केही कन्टेन्टहरु बाहिरिएको छैन । समयमै रिलिज हुन्छ कि हुँदैन ? यी यावत् प्रश्नहरूको जवाफ चाडै निर्माता वा निर्माण कम्पनीबाट आउने अपेक्षा गरौं ।