‘कुमारी’को प्रचार काठमाडौंदेखि कोशी प्रदेशसम्म आक्रामक प्रचार, बिर्तामोड पुग्दा भावुक बने नायक

इटहरी/ प्रदर्शन मिति नजिकिएसँगै वर्षकै प्रतीक्षित लभ स्टोरी फिल्म ‘कुमारी’ले आफ्नो प्रचार अभियानलाई आक्रामक बनाइरहेको छ । काठमाडौँको भृकुटीमण्डपमा १० हजार दर्शकको साक्षीमा ऐतिहासिक ट्रेलर रिलिज गरेर चर्चा बटुलेको यो टोली, यतिबेला कोशी प्रदेशको साङ्गीतिक र भावनात्मक यात्रामा होमिएको छ । माघ २३ गतेको प्रदर्शन मिति पर्खिरहेको फिल्मको टोलीले मोरङको मधुमल्ला बजारमा भव्य ‘लाइभ म्युजिकल कन्सर्ट’ सम्पन्न गरेको छ ।

स्थानीय भगवती माध्यमिक विद्यालयको प्राङ्गणमा आयोजित कार्यक्रममा २ हजारभन्दा बढी दर्शकको उपस्थितिले फिल्म प्रतिको क्रेज पुष्टि गरेको थियो । पुस माघको चिसो सिरेटो र रातको ११ बजिसक्दा पनि दर्शकहरू मैदान छोड्न तयार भएनन् । जब फिल्मका पार्श्व गायक केहर सिं लिम्बुले ‘डोको बुन्ने’, ‘कता छौ’ र ‘तिमी बिना’ जस्ता हिट गीतहरू गाउन सुरु गरे, माहोल तातिएको थियो ।

अझ, ८५ लाखभन्दा बढी भ्युज बटुलिसकेको चर्चित गीत ‘डोको बुन्ने’ मा फिल्मका मुख्य कलाकार अबिषेक खड्का र आकृति राजभण्डारीले लाइभ नृत्य प्रस्तुत गर्दा दर्शकहरूको उत्साह थामिनसक्नु थियो । प्रचारकै क्रममा शनिवार झापाको बिर्तामोड पुग्दा माहोल निकै भावुक र आत्मीय बन्यो । अभिनेता अबिषेक खड्का अभिनेत्री आकृतिसहित आफ्नो गृह नगर पुग्दा, उनलाई आफन्त र छिमेकीहरूले भव्य स्वागत गरेका थिए । लामो समयपछि आफ्नो घर फर्किँदा र बुबालाई भेट्दा अबिषेकका आँखा रसाएका थिए ।

@parikalanewsofficial

पहिलो फिल्मबाटै अपार माया र चर्चा बटुलिरहेका अबिषेकलाई देख्दा परिवार र समाजमा छाएको खुसीले नायक-नायिका दुवैलाई भावुक बनाएको थियो । यसअघि काठमाडौँको भृकुटीमण्डपमा १० हजार दर्शकमाझ ट्रेलर सार्वजनिक हुँदा पाएको प्रतिक्रियाले निर्माण टिम उत्साहित छ । निर्देशक दिनेश राउत भन्छन्, “ट्रेलर सार्वजनिक गर्दा र प्रचारका क्रममा देखिएको दर्शकको मायाले हामीलाई फिल्म हलसम्म पनि यस्तै साथ मिल्ने विश्वास दिलाएको छ ।”

विनिश इन्टरटेन्मेन्टको ब्यानरमा निर्माण भएको फिल्मका निर्माता महेन्द्र अधिकारी हुन भने कार्यकारी निर्माता केदार भुसाल हुन् । प्रेम, सङ्घर्ष र पारिवारिक अन्तर्द्वन्द्वको कथा पस्कने फिल्ममा अबिषेक खड्का, आकृति राजभण्डारी, घनश्याम जोशी, सुनिता श्रेष्ठ, आकाङ्क्षा कार्की लगायतको अभिनय रहेको छ । विकास सुवेदी लेखन, सुसन प्रजापति छायाङ्कन, सुप्रिम पराजुली सम्पादन र रोयल भीमसेन पोस्टर डिजाइन यो फिल्ममा रहेको छ ।