‘द ब्ल्यू लाइट’ टिजर: जहाँ प्रेम अन्त्य हुन्छ र सुरु हुन्छ प्रतिशोधको ‘साइकोलोजिकल’ युद्ध

इटहरी/ पर्दामा देखिने रङ्गीन प्रेम सम्बन्ध जब रगत, अविश्वास र बदलाको खेलमा परिणत हुन्छ, तब सुरु हुन्छ– ‘द ब्ल्यू लाइट’ को कथा । बिहीबार क्रिसमसको अवसर पारेर ‘मौरी पिक्चर्स’ मार्फत सार्वजनिक भएको फिल्मको टिजरले दर्शकलाई एउटा कहालीलाग्दो मनोवैज्ञानिक यात्रा गराउने संकेत गरेको छ ।

महेश त्रिपाठी र बेनिशा हमालको संवादबाट सुरु हुने टिजरले दर्शकलाई झुक्याउँछ । सुरुमा सामान्य प्रेम र रोमान्स जस्तो लाग्ने दृश्यहरू एक्कासि आक्रमण, प्रतिशोध र हत्याको त्रासपूर्ण वातावरणमा बदलिन्छन् । टिजरमा मुख्य पात्रहरू एउटा यस्तो चक्रव्यूहमा फसेका देखिन्छन्, जहाँ उनीहरू एक-अर्कालाई सिध्याउने खेल खेलिरहेका छन् ।

प्रहरी हिरासत, बयान र अपराधका श्रृंखलाबद्ध घटनाहरूले कथालाई थप पेचिलो बनाएको छ । टिजरको ब्याकग्राउन्ड स्कोर र ‘कलर ग्रेडिङ’ले फिल्मको ‘डार्क टोन’ लाई न्याय गरेको देखिन्छ । निर्माण टिमले टिजरसँगै दर्शकका लागि नयाँ प्रदर्शन मिति पनि तय गरेको छ । यसअघि पुस १० गते आउने भनिएको यो फिल्म अब माघ १६ गते देखि प्रदर्शन हुनेछ । हेर्नुस् टिजर ।

बलिराम चौहानको निर्देशन रहेको ‘द ब्ल्यू लाइट’ मा अभिनयको राम्रो जमघट देख्न सकिन्छ । फिल्ममा बेनिशा हमाल, अर्पण थापा, आयुसमान देशराज जोशी, सृष्टि श्रेष्ठ, महेश त्रिपाठी र सुरक्षा इटानी मुख्य भूमिकामा छन् भने बाल कलाकारमा ग्रिस्मा कटुवाल र सहारा शर्मा छन् । स्काइफल पिक्चर्सको ब्यानरमा निर्माण भएको फिल्मको प्राविधिक पक्ष पनि अब्बल देखिन्छ ।

@parikalanewsofficial

यो फिल्मको छायांकन तथा कार्यकारी निर्माता नरेन्द्र मैनाली हुन भने यसको कार्यकरी निर्माता फिल्मकी प्रमुख अभिनेत्री बेनिशा हमाल हुन । उनले यही फिल्मबाट नेपाली फिल्महरुको डिजिटल अधिकार आफ्नो मौरी पिक्चर्स कम्पनी मार्फत खरिद गर्ने कामको थालनी गरेकी छन् । यस्तै फिल्मको सह-निर्मातामा भोलानाथ कटुवाल र रमन ग्रे रहेका छन् भने आकाश उखेडा मुख्य सहायक निर्देशक, रेलिजा श्रेष्ठ प्रोडक्सन डिजाइनर र दिलीप पन्त निर्माण नियन्त्रकको रुपमा रहेका छन् ।