फिल्म ‘एक्लो’को दमदार ट्रेलर सार्वजनिक, हलिउडको झल्को दिने कथा र प्रस्तुति

इटहरी/ नेपाली फिल्म जगतमा साइन्स–फिक्सन विधामा एउटा महत्वकाङ्क्षी छलाङ मार्ने उद्देश्यसहित निर्माण भएको फिल्म ‘एक्लो’ को ट्रेलर सार्वजनिक भएको छ । ललितपुरको लाविम मलमा आयोजित एक भव्य समारोहका बीच ओएसआर डिजिटल मार्फत करिब ३ मिनेट लामो ट्रेलर रिलिज गरिएको हो । ट्रेलर हेर्दा फिल्मले नेपाली फिल्मको प्राविधिक र कथा वाचनको स्तरलाई नयाँ उचाइमा पुर्‍याउने संकेत गरेको छ ।

सन् २०३० पछिको भविष्य र रहस्यमय हिमालयको कथा
निर्देशक प्रदीप शाहीले फिल्ममा पूर्वीय आध्यात्मिक परम्परा र पश्चिमा साइन्स–फिक्सन जनराको अनौठो मिश्रण गरेका छन् । ट्रेलरले भविष्यको एक काल्पनिक तर कहालीलाग्दो कथा बोल्छ । सन् २०३० सम्म पृथ्वीमा फैलिएको एक खतरनाक भाइरसका कारण मानिसहरूले ग्रह नै छाड्नुपरेको अवस्था देखाइएको छ । हेर्नुस् ट्रेलर ।

त्यसको ६० वर्षपछि बेलायती अन्तरिक्ष यात्री ज्याक (बेलायती अभिनेता जेमी बेकन) र उनका साथीहरू हिमालय क्षेत्रमा ‘क्र्यास-ल्यान्डिङ’ गर्छन् । उनीहरूले हिमालको खोँचमा लुकेको एउटा रहस्यमय शहर फेला पार्छन्, जहाँ उनीहरूको भेट हिमालयका पौराणिक संरक्षक (प्रदीप खड्का) सँग हुन्छ । यसपछि सुरु हुने संघर्ष र रहस्यको कथालाई फिल्मले पर्दामा उतारेको छ ।

निर्देशक शाहीका अनुसार यो कथाको पूर्ण अन्त्य यही फिल्ममा नभई यसको ‘दोस्रो भाग’ मा हुनेछ । रिलिज अगावै ‘एक्लो’ ले अन्तर्राष्ट्रिय बजारमा चर्चा बटुलिरहेको छ । विश्वप्रसिद्ध कान्स फिल्म फेस्टिभलको ७८ औँ संस्करणको मार्केटमा सहभागी भई यसले अन्तर्राष्ट्रिय वितरकहरूको ध्यान खिचेको थियो । अब यसको ऐतिहासिक प्रिमियर यही डिसेम्बर २८ तारिखमा अमेरिकाको न्युयोर्कस्थित प्रतिष्ठित ‘म्युजियम अफ द मुभिङ इमेज’ मा हुने तय भएको छ ।

@parikalanewsofficial

ट्रेलर रिलिज कार्यक्रममा फिल्मका प्रमुख कलाकारहरू प्रदीप खड्का, विजय लामा, सुनील थापा, दिया पुन, वेनिशा हमाल, दिनेश डीसी, कविता नेपाली, सुरजसिंह ठकुरी लगायतको बाक्लो उपस्थिति थियो । चलचित्र विकास बोर्डका अध्यक्ष तथा कलाकार दिनेश डीसीले आफ्नो व्यस्तताका बाबजुद पनि स्क्रिप्ट र टिम मन परेर अभिनय गरेको बताए । उनले भने, “निर्देशक शाहीले प्राविधिक र अन्तर्राष्ट्रिय रूपमा नेपाललाई चिनाउने गरी गजबको फिल्म बनाउनुभएको छ ।”

बेलायतमा बसेर फिल्म निर्माणमा सक्रिय निर्देशक प्रदीप शाहीको यो तेस्रो निर्देशकीय फिल्म हो । यसअघि उनले ‘अन्तिम संस्कार’ र ‘गोर्खा: बिनिथ द ब्रेभरी’ निर्देशन गरिसकेका छन् । एनआरएन समूहको लगानी र विनोद सुवेदी ‘क्षितिज’ को कार्यकारी निर्माण रहेको यो फिल्म मुस्ताङ र काभ्रेको पनौतीमा छायाङ्कन गरिएको हो । हलिउड स्तरको भिएफएक्स र कथा प्रस्तुत गर्ने दाबी गरिएको ‘एक्लो’ आगामी पुस १७ गतेदेखि नेपालसहित विश्वभर एकसाथ प्रदर्शनमा आउँदैछ ।