दया र मिरुनाको ‘रङ्गेली ग्याङ्स्टर्स’ बाट हट्यो ‘ग्याङ्स्टर्स’, अडिसनबाट छानिए ४० कलाकार

इटहरी/ नामकै कारण पनि धेरैको चासो बनेको फिल्म ‘रङ्गेली ग्याङ्स्टर्स’ को नाममा हेरफेर गरिएको छ । निर्माण युनिटले एक प्रेस वक्तव्य जारी गर्दै यसअघि सार्वजनिक गरिएको फिल्मको नाम ‘रङ्गेली ग्याङ्स्टर्स’बाट ग्याङ्स्टर्स हटाईएको छ । अब फिल्मको नाम ‘रङ्गेली’ मात्रै रहने छ । यो फिल्ममा दयाहाङ राई र मिरुना मगर अनुबन्ध भैसकेपछी फिल्मको चर्चा एकाएक बढेको थियो भने कोशी प्रदेशको इटहरीमा यो फिल्मका अन्य कलाकारहरुको लागी अडिसन राखिएको थियो । अडिसनमा देशभरबाट १ सय ६० बढीको उपस्थिति रहेको निर्माण युनिटले जानकारी गराएको छ ।

अडिसनकै लागी भनेर कोशी प्रदेशका कलाकारहरूदेखी काठमाडौ, बिरगंज, जनकपुर, राजबिराज, बर्दिबाससंगै धनगढीदेखी पनि अडिसनका उपस्थिति रहेको थियो । गएको अगस्ट ६ तारीखका दिन इटहरीको पुर्वान्चल इन्स्टिच्युट अफ फिल्म एण्ड टेलिभिजनमा लिइएको अडिसन सम्भवत कोशी प्रदेशमै पहिलो पटक यति भब्य अडिसन भएको हो । उक्त अडिसनबाट निर्माण युनिटले कलाकार छनौट पनि सम्पन्न गरेको छ । कलाकारहरुको लाईनअप पुर्ण गरेसंगै नाममा हेरफेर र प्रदर्शन मिति समेत तय गरेको हो । ‘रङ्गेली’लाई महाशिवरात्रीको अवसर पारेर यहि आउँदो फागुन २५ गतेबाट औपचारिक प्रदर्शन गरिने भएको हो ।

नाममा केही अन्योलता छाएपछी मोरङ जिल्लामा अवस्थित त्यहाँका स्थानीय समुदायका अग्रजहरू तथा स्थानीय निकायबाट नाममा परिमार्जन गर्न गरेको अनुरोधलाई निर्माण युनिटले सहर्ष स्विकार गर्दै नयाँ नाम सार्वजनिक गरिएको वक्तव्यमा जनाईएको छ । जसले समाज भित्र सकारात्मकता, एकता र सम्मानको वातावरण कायम राख्न सहयोग पुग्नेमा निर्माण युनिट विश्वस्त छ । तर, फिल्मको स्कृप्टमा भने कुनैपनी परिमार्जन गरिएको छैन । अर्जुन सुवेदीको लेखन तथा निर्देशन रहने फिल्ममा दया, मिरुनासंगै अर्पण थापा, प्रविण खतिवडा र अडिसनबाट अन्य ४० जना कलाकारहरूलाई फाइनल गरिएको छ । फिल्मको कार्यकारी निर्माताहरू जीतेन्द्र खतिवडा र अनुज जङ्ग थापा हुन् । यसमा निर्माताहरू संसार चौलागाईं र रमेश भट्टराई बशिष्ठ हुन् भने युवक कार्की र शिव थपलिया सह-निर्माता हुन् । बिबेक खड्का (योलो) एशोसियट निर्माता हुन् । यहि भदौ २० गतेबाट फिल्म छायाङ्कन सुरु गरिने बताईएको छ ।