‘सोल्टिनी’को इटहरीमा पत्रकार भेटघाट, परीक्षाले गरिन् प्रकाशको खुलेर तारिफ

इटहरी/ सामाजिक यथार्थ र अन्तरजातीय प्रेमको संवेदनशील कथा बोकेको नेपाली फिल्म ‘सोल्टिनी’ प्रदर्शनको संघारमा कोशी प्रदेशका मुख्य शहरहरूमा भव्य प्रचार-प्रसार गरिएको छ । तिहारको देउसी-भैलोको अवसर पारेर ‘सोल्टिनी’ टिम यतिबेला देशव्यापी प्रचार यात्रामा छ । यसै क्रममा, लक्ष्मी पूजाको दिन (कार्तिक ३ गते) सुनसरीको इटहरीस्थित फुडशाला क्याफेमा आयोजित पत्रकार भेटघाटमा फिल्मका मुख्य कलाकार प्रकाश सपुत र परीक्षा लिम्बू सहितको टोलीले फिल्मबारे जानकारी गराए ।

अभिनेता प्रकाश सपुतले ‘सोल्टिनी’लाई “पूर्वेली समाजको सांस्कृतिक विविधता, जातीय विविधता र समाजका विभिन्न रंगहरूलाई समेटेर एउटा मिठो लयमा बनेको मौलिक र अर्गानिक फिल्म” का रूपमा व्याख्या गरे । उनले आफूलाई यो फिल्मका मुख्य पात्र भएर अभिनय गर्न पाउनुलाई भाग्यमानी महसुस गरेको बताए ।

यस्तै पत्रकार भेटघाटमा नायिका परीक्षा लिम्बूले अभिनेता सपुतको खुलेर प्रशंसा गर्दै फिल्मको कथावस्तु उत्कृष्ट रहेकोले दर्शकको मन जित्नेमा आफू ढुक्क रहेको बताइन् । उनले ‘सोल्टिनी’को स्क्रिप्ट पढ्ने बित्तिकै धेरै कुरा समेटिएको महसुस गरेर यसमा जोडिनु पर्छ भन्ने लागेको अनुभव सुनाइन् । पत्रकार भेटघाटमा प्रकाश र परीक्षासँगै अभिनेता तथा प्रोजेक्ट हेड सुजन खतिवडा र बालकलाकारहरू शुभम् अधिकारी तथा हार्दिक पौडेलको पनि सहभागिता थियो ।

@parikalanewsofficial

प्रचार यात्रा अन्तर्गत, टोलीले कार्तिक २ गते झापाको दमकमा देउसी-भैलो तथा सांगीतिक कार्यक्रम गरेपश्चात् ३ गते इटहरीमा पत्रकार भेटघाट र सोही दिन साँझ धरानमा देउसी-भैलोसहितको कार्यक्रम सम्पन्न गरेको हो । कोशी प्रदेशको यो व्यस्त तालिकापछि ‘सोल्टिनी’ टिम हाल आफ्नो प्रचार यात्रालाई निरन्तरता दिन पोखरा पुगेको छ ।

अर्जुन सुवेदी निर्देशित यो फिल्मको कथा लेखनमा निर्देशक स्वयं र कुमार भट्टराईको सहकार्य रहेको छ । फिल्ममा प्रकाश सपुत र परीक्षा लिम्बुसँगै सुन्दर धिताल, सबु गुरुङ, सुजन खतिवडा, विल्सन विक्रम राई, रवीन्द्र झा, प्रकाश घिमिरे, प्रेम सुब्बा र कविता आले लगायतका कलाकारहरूको अभिनय रहेको छ ।

रेजिना विष्ट र संसार चौलागाईं द्वारा निर्मित ‘सोल्टिनी’ मा रोशन चौलागाईं, वसन्त कटवाल र सुजन अधिकारी सहायक निर्माताका रूपमा रहेका छन् । प्लानेट थ्री फिल्म र योलो इन्टरटेन्मेन्ट को ब्यानरमा निर्माण भएको यो फिल्मले सामाजिक विभेद र अन्तरजातीय प्रेममा देखिने संघर्षलाई पर्दामा सशक्त रूपमा प्रस्तुत गर्ने अपेक्षा गरिएको छ ।