‘वरिष्ठ बलराम’की समृद्धि भन्छिन्-‘म शो पिस होइन, इम्प्याक्टफुल क्यारेक्टर हो’

इटहरी/ आउँदो भाइटीका अर्थात् कार्तिक ६ मा रिलिज हुन लागेको नेपाली फिल्म ‘वरिष्ठ बलराम’मा नायिका समृद्धि अर्यालले आफू प्रभावशाली भूमिकामा रहेको बताएकी छन् । उनी भन्छिन्, “म जहाँ जहाँ आउँछु, त्यहाँ इम्प्याक्टफुल भूमिका छ भन्ने लाग्छ । दुई लिड क्यारेक्टरलाई प्रभाव पार्ने खालको भूमिका गर्न पाएकी छु ।” फिल्ममा समृद्धिले विजय बरालको अपोजिटमा अभिनय गरेकी छन् ।

दयाहाङ राई र विजय बरालजस्ता अनुभवी कलाकारसँग काम गर्नु चुनौतीपूर्ण भए पनि आफूले धेरै सिक्ने अवसर पाएको उनले बताइन् । “दुवै अग्रज र अब्बल कलाकार हुन् । त्यसैले सुरुवातमा डर लाग्यो, तर यो फिल्म मेरो लागि सिकाइको ठुलो अवसर बन्यो,” समृद्धिको भनाइ छ । उनका अनुसार, ‘वरिष्ठ बलराम’मा आफ्नो भूमिका कुनै शो पिस मात्र नभई कथा प्रवाहमै महत्वपूर्ण छ ।

उनले थपिन्, “बलरामको क्यारेक्टरको जर्नीमा मेरो भूमिका सहयोग गर्ने इम्प्याक्टफुल क्यारेक्टर हो । कुशुमको भूमिकामा दर्शकले मलाई नयाँ रुपमा देख्नेछन् ।” पहिलो फिल्म ‘फर्की फर्की’ बाट डेब्यू गरेकी समृद्धिले यो फिल्मलाई आफ्नो करियरको अर्को महत्वपूर्ण मोडका रूपमा लिएकी छन् । उनी भन्छिन्, “यो क्यारेक्टर भोलि कति लोकप्रिय हुन्छ थाहा छैन, तर दर्शकले सम्झिने खालको छ भन्ने लाग्छ ।”

‘वरिष्ठ बलराम’ लाई सुरेन्द्र पौडेलले निर्देशन गरेका हुन् । फिल्ममा दयाहाङ राई, विजय बराल, समृद्धि अर्याल, पशुपति राई, माओत्से गुरुङ, भोलाराज सापकोटा, रामबाबु रेग्मी, प्रदीप कुमार चौधरी (पीके) लगायतका कलाकारले अभिनय गरेका छन् । फिल्मको कथा र सम्पादन निर्देशक पौडेलकै रहेको छ भने पटकथा महेश दवाडीले लेखेका छन् । वृषभ सिद्धि इन्टरटेनमेन्टको प्रस्तुतिमा आन्भी फिल्म्सको सहकार्यमा निर्माण गरिएको यस फिल्मका निर्माता आशिष एच तामाङ र श्रीराज कार्की हुन् ।

@parikalanewsofficial

कार्यकारी निर्माता प्रदीप जी धामी र पुस्कर बी घिमिरे, लाइन प्रोड्युसर राम विष्ट, छायांकन मनकृष्ण महर्जन, संगीत प्रशान्त शिवाकोटी, एक्सन निर्देशन सम्राट बस्नेत, र नृत्य निर्देशन प्रदीप लामा रहेका छन् । फिल्मको वितरण काठमाडौँ उपत्यकामा डीसीएन र उपत्यका बाहिर कुवेर सिने डिस्ट्रिब्युसनले गर्नेछ भने अन्तराष्ट्रिय डिस्ट्रिब्युसनको जिम्मा सेभेन सिज सिनेमाले लिएको छ ।