सबैले हेर्न मिल्नेगरी फिल्म माईतीघरको सेन्सर पास, देशभर खुल्यो अग्रिम बुकिङ

इटहरी/ यही दशैंको फूलपातिसँगै रिलिज हुन लागेको नेपाली फिल्म ‘माइतीघर’ सेन्सर पास हुँदै अब पूर्णरुपमा प्रदर्शनका लागि तयार भएको छ । चलचित्र जाँच पास समितिले यसलाई ‘यूनिभर्सल’ सर्टिफिकेट प्रदान गरेको छ, जसका कारण सबै उमेर समूहका दर्शकले निःसंकोच हेर्न पाउने भएका छन् ।बुधबार साँझ सेन्सर समितिका सदस्यहरूले लामो समयपछि उत्कृष्ट पारिवारिक र भावनात्मक कथावस्तुमा आधारित फिल्म देख्न पाएको अनुभव सुनाएका थिए ।

फिल्ममा प्रस्तुत कमेडी, पारिवारिक र भावनात्मक पक्षको प्रशंसा गर्दै सेन्सर सदस्यहरूले निर्माण टिमलाई बधाईसमेत दिएका थिए । निर्माता रोहित अधिकारीले ‘माइतीघर’ले दर्शकलाई निराश नबनाउने दाबी गर्दै दशैंको अवसरमा सुखद व्यापारिक सुरुवात गर्ने विश्वास व्यक्त गरेका छन् । यस फिल्मको ट्रेलर र शीर्ष गीतले नै दर्शकको उत्सुकता बढाइसकेका छन् भने बुकिङ खुलेसँगै देशभर सयभन्दा बढी शो सुनिश्चित भइसकेका छन् । केही हलमा अझै शो खुलाउन हुन बाँकी छ ।

फिल्मलाई बिहान सवा पाँच बजेदेखि बेलुकासम्म अधिकांश हलले प्रदर्शन गर्ने तयारी गरेका छन्, जसले दर्शकको प्रतिक्षा र उत्साह झनै बढाएको छ । रामशरण पाठकको लेखनमा बनेको ‘माइतीघर’मा केदारप्रसाद घिमिरे, धिरज मगर, प्रकाश सपुत, उपासना सिंह ठकुरी, श्यामाश्री शेर्पा, युवराज लामा, बुद्धि तामाङ, शिशिर वाङ्देललगायतका कलाकारको अभिनय रहेको छ । निर्माण पक्षले बलियो ‘वर्ड अफ माउथ’को अपेक्षा गर्दै फिल्मले दशैंमा पारिवारिक मनोरञ्जन दिने विश्वास व्यक्त गरेको छ ।

@parikalanewsofficial