भदौमा नेपाली फिल्महरुको हाटबजार र भिडन्त, हिन्दीसंग भागाभाग

इटहरी/ नेपाली चलचित्र उधोगमा नेपाली फिल्महरुको जुधाई हेर्न सार्है रमाइलो हुन्छ । कुनै महिना सिनेमा हलमा नेपाली फिल्मको खडेरी लाग्छ भने कुनै महिना हाटबजार जस्तै हुन्छ । यसपटक यस्तै भएको छ । यो साउन महिना सुक्खा रह्यो । यो साउन ५ गतेबाट फिल्म लुङा प्रदर्शनमा आयो । तर, धेरैले यो फिल्म प्रती चासो देखाएनन् । यता, यहि साउनको १९ गते अदृश्य नामक फिल्म प्रदर्शन हुँदैछ । यसको पनि पुर्व मुल्यांकन गर्ने हो भने हविगत त्यही हो । दर्शकले मतलब नै गर्दैनन् । बरु असार २९ गतेबाट प्रदर्शन गरिएको फिल्म ‘बगान’ले तानतुन गरेर भएपनी यो महिना कटाउला जस्तो देखिन्छ । तर, हलहरुले यो फिल्मलाई पनि उतार्न थालेका छन् ।

अब भदौमा भने बैसाख भरी लाग्ने मेला जस्तै नै छ नेपाली फिल्मको ताती । भदौभरी ८ दिन त सरकारी छुट्टी नै छ । अनि कस्लाई नहोला र ब्यापारको लोभ ? चल्तिका कलाकार र ब्यानरको नजर यहि महिना परेको छ । मिलेर हैन जुधेर भएपनी फिल्म चाहिँ चलाउने । भदौ भरी ७ ओटा नेपाली फिल्म र एउटा हिन्दी फिल्म प्रदर्शनमा आउँदै छ । भदौको १ गतेबाट अभिनेता गौरव पहारी र नम्रता सापकोटाको प्रमुख भुमिका रहेको फिल्म ‘नम्बरी सुन’ र अभिनेता आकाश श्रेष्ठ र सलोन बस्नेतको प्रमुख भुमिकामा निर्माण भएको फिल्म ‘हिँड्दा हिँड्दै’ एकआपसमा जुधेर प्रदर्शनमा आउँदै छ ।

यस्तै, अभिनेता सलोन बस्नेत, अर्पण थापा, अभिनेत्री केकि अधिकारी, निशा अधिकारी लगायतको प्रमुख भुमिकामा भदौ ८ गतेबाट फिल्म ‘जय हो’ प्रदर्शन हुने भएको छ । त्यसपश्चात् भदौ १४ गतेबाट कृषा चौलागाँइको निर्देशनमा स्वस्तिमा खड्का, वर्षा राउत, सुशिल सिटौला लगायतले अभिनय गरेको फिल्म ‘ऐचो पैचो’ संग मुकुन भुषाल र मेनुका प्रधानको प्रमुख अभिनय रहेको फिल्म ‘गणपति’ एकअपसमा जुध्दै प्रदर्शनमा आउँने पक्का भएको छ । आफू आफु जुधे पनि भारतिय नायक साहरुख खानको फिल्म ‘जवान’ संग भने कसैले जुध्ने हिम्मत गर्न सकेका छैनन् । जुध्यो कि पछारी हाल्छन्, यतिसम्म कि यसअघि केजिएफ २ संग जुध्ने हिम्मत गरेका ‘ए मेरो हजुर ३’ निर्माण युनिट समेतले जवानलाई भदौ २१ मा एक्लै छोड्दिए ।

झरना थापा र सुनिल कुमार थापा बलिउड फिल्मसंग जुध्न त्यही बेला काब्बु भएको यहिबाट बुझ्न सकिन्छ । यी दम्पतीको प्रतिक्षित बनेको फिल्म ‘एक भगवत् गीता’ भदौको २९ गते सार्वजनिक प्रदर्शनमा आउँदैछ । बिपिन कार्कीलाई कमलामाईको अवतारमा प्रस्तुत गरेपछि यो फिल्मप्रती चासो बढेको छ । फिल्ममा अभिनेत्री सुहाना थापा, अभिनेता धिरज मगर लगायत कलाकारको अभिनय रहेको छ । यता यो फिल्मसंग अर्को नेपाली फिल्म भने जुध्ने टुङ्गो लागिसकेको छ । दीपेन्द्र लामाको निर्देशनमा बनेको फिल्म ‘नाङ्गो गाउँ’ जुध्ने पक्का भएको हो । यसर्थ अन्य भन्दा आउँदो भदौ महिनामा यी २ फिल्मको टक्कर अलि रोचक हुनेछ । ‘नाङ्गो गाउँ’ मा दयाहाङ राई, मिरुना मगर, साम्राज्ञि राज्यलक्ष्मी शाह, कर्मा लगायत कलाकारको अभिनय रहेको छ ।