शनिबार फिल्म ‘सतीदेवी’को विशेष प्रदर्शनी अमेरिकाको भर्जिनीया हुने

इटहरी/ तीजको उल्लास र नारी सम्मानको भावनासहित अमेरिकाको भर्जिनीयामा आउँदो शनिबार अर्थात् साउन ३१ गते ‘अगस्त १६’ का दिन नेपाली फिल्म ‘सतीदेवी’ को विशेष प्रदर्शनी हुने भएको छ । लामो समयदेखि अमेरिका बसोबास गर्दै आए पनि नेपाली फिल्म, कलाकारिता र समाजसेवामा सक्रिय आयोजक पुष्कर पन्तका अनुसार, यस शोको उद्देश्य दर्शकलाई उत्कृष्ट नेपाली फिल्म अनुभव गराउनु हो ।

लक्ष्मण सुवेदीको लेखन, निर्माण र निर्देशनमा बनेको ‘सतीदेवी’ ले राष्ट्रिय चलचित्र विकास बोर्डको राष्ट्रिय चलचित्र अवार्ड–०८० मा विशेष चलचित्र पुरस्कारसहित हालसम्म एक दर्जन अवार्ड जितिसकेको छ । मलिका महत, रमेश बुढाथोकी, सन्दिपबाबु लोहनी, कुलबहादुर अधिकारी, सृजना अधिकारी, बालकलाकार हर्षिका वली र मञ्जिला बानीयाँ लगायतको अभिनय रहेको यो नारी प्रधान फिल्मलाई दर्शकले उच्च प्रशंसा दिएका छन् ।

@parikalanewsofficial

दिलासा कृएसनको प्रस्तुति र गोल्डेन स्टेट मुभी मेकर्स एलएलसी क्यालिफोर्नीयाको सहकार्यमा बनेको यस फिल्मका निर्मातामा दिलासा, सारा, श्रीदेवी र बिशाल सुवेदी रहेका छन् । निर्देशक सुवेदीका अनुसार, भर्जिनीयापछि ‘सतीदेवी’ का विशेष शो अन्य अमेरिकी स्टेटहरूमा पनि आयोजना गरिनेछन् ।