इनरुवामा एकल महिलालाई यो शुक्रवार फिल्म ‘बगान’ निशुल्क: आवतजावतको सुविधा

इटहरी/ एकल महिलाको कथाव्यथामा निर्माण भएर हाल प्रदर्शनरत फिल्म ‘बगान’ सुनसरी सदरमुकाम इनरुवामा निशुल्क प्रदर्शन गरिने भएको छ । इनरुवा ५ वडा कार्यालयले एक बिज्ञाप्ति जारी गर्दै यो अवसर प्रदान गर्ने जानकारी गराईएको हो । इनरुवा अवस्थित ५ नम्बर वडामा रहेका एकल महिलालाई लक्षित गर्दै आवतजावतको सुविधा सहित फिल्म ‘बगान’ प्रदर्शन गर्न लागिएको हो । फिल्मका माध्यमबाट समाजमा मनोरञ्जन मात्रै हैन सुचना, शिक्षा र सचेतना पनि फैल्याउन सकिन्छ भन्ने हेतुसहित सरकारी तवरबाट चालिएको यो कदमलाई स्वागतयोग्य मान्न सकिन्छ ।

इनरुवा नगरपालिका वडा नम्बर ५ का वडाध्यक्ष अनिल कुमार पोख्रेलद्वारा जारी बिज्ञप्तिका अनुसार ‘बगान’ फिल्म यहि आउदो शुक्रवार अर्थात साउन १२ गते १२ बजे प्रदर्शन गर्न लागिएको हो । इनरुवाको सिबि सिनेमा हलमा प्रदर्शन गरिने फिल्म हेर्नको लागि एकल महिलाहरुलाई आव्हान गरिएको छ । जारी बिज्ञप्तिका अनुसार उक्त फिल्म हेर्नको लागी यहि बुधवार दिनको १ बजे ५ नम्बर वडा कार्यालय इनरुवामा नागरिकताको फोटोकपी र एकल महिला भत्ता कार्ड सहित उपस्थिति हुन अनुरोध गरिएको छ ।

औसत व्यापार गरिरहेको फिल्म यतिबेला प्रदर्शनको दोश्रो हप्तामा छ । अन्य कुनै फिल्म प्रतिष्पर्धी नभैरहेको अवस्थामा यो फिल्मले मौका उठाईरहेको छ तर, खासै चर्चा भने बटुल्न सकिरहेको छैन । फिल्मको १० दिने कलेक्सन हेर्ने हो भने ७० लाख भन्दा बढी रहेको निर्माण युनिटको भनाई छ । फिल्मलाई अभिनेता सरोज खनालले निर्देशन गरेका हुन् । उनले यहि फिल्मबाट निर्देशनमा डेब्यु गरेका छन् भने उनी सहित करिष्मा मानन्धर, आकाश श्रेष्ठ, नीर शाह, प्रमिला कार्की, मिथिला शर्मा, बसुन्धरा भुषालको प्रमुख भुमिका रहेको छ । फिल्मलाई सुरेश वाग्लेले निर्माण गरेका हुन् । काठमाडौ महानगरपालिकाले केहि दिनअघि जथाभावी पोस्टर टासेको भन्दै ५० हजार जरिवाना तिराएपछी फिल्मले अझै पब्लिशिटी पाएको थियो ।