फिल्म ‘परालको आगो’ मा जितु नेपालको ठाउँमा सौगात मल्लको इन्ट्री

इटहरी/ नेपाली साहित्यमा गहिरो छाप छोडेको कथाकार गुरु प्रसाद मैनालीको चर्चित कृति ‘परालको आगो’ अब फिल्मको रूपमा पर्दामा आउँदैछ । यसैबीच, यस फिल्ममा मुख्य भूमिकाका लागि सुरुमा तय भएका कलाकार जितु नेपाल बाहिरिएपछि अब उनको स्थान अभिनेता सौगात मल्लले लिने भएका छन् । जितु नेपालले आफूले फिल्म छाड्नुको कारण स्पष्ट गर्दै एक भिडियो सार्वजनिक गरेका छन् ।

उनले निर्माण युनिटसँग कुनै मनमुटाव नभएको र दशैंमा सुटिङ पर्न गएपछि परिवारलाई समय दिन नसक्ने भएकाले बाध्यतावश फिल्म छाड्नुपरेको बताएका छन् । उनले गलत हल्लामा ध्यान नदिन पनि आग्रह गरेका छन् । यसपछि अभिनेता सौगात मल्लसँग निर्माता सुशील पोखरेलबीच सम्झौता भइसकेको छ र उनी अब फिल्मको मुख्य भूमिकामा देखिनेछन् ।

सौगातको इन्ट्रीसँगै फिल्मको कलाकार टोली पनि पूर्ण भएको छ । यसअघि अभिनेत्री सुहाना थापा, प्रकाश सपुत, ज्याक श्रेष्ठ, किशोर भण्डारी, शंकर आचार्य, सरिता भण्डारी, सृजना अधिकारी, कुलदीप अधिकारी, रेणु न्यौपाने लगायतका कलाकारहरू फाइनल भइसकेका छन् । फिल्म ‘परालको आगो’ मा दुई प्रमुख पुरुष पात्र रहनेछन् ।

@parikalanewsofficial

कथा चामे, गौंथली र जुठे दमाईको वरिपरि घुम्नेछ । फिल्मको छायांकन संकल्प भुजेलले गर्नेछन् भने कोरियोग्राफी रामजी लामिछाने र संगीत सत्यस्वरुपराज आचार्यको रहनेछ । निर्देशक लक्ष्मण सुनारले लोकेशन, प्रस्तुतीकरण र पटकथामा नयाँ प्रयोग गरिने बताएका छन् । फिल्म आउँदो वर्ष प्रदर्शन गर्ने लक्ष्यसहित निर्माणको तयारीमा भईरहेको छ ।