इटहरी/ नेपालीपनको सुगन्ध बोकेको फिल्म ‘यो मन त मेरो नेपाली हो’टिमले बुधबार साँझ काठमाडौंको कमलपोखरीस्थित बिग मुभिजमा भव्य प्रिमियर शो आयोजना सम्पन्न गरेको छ । नेपाली भाषा, साहित्य, कला र राष्ट्रप्रेमको सजीव प्रस्तुति दिन तयार यो फिल्म यही शुक्रबार (असार २७) देखि देशभर एकसाथ प्रदर्शनमा आउँदैछ । उक्त प्रिमियर कार्यक्रम राष्ट्रिय भावना, कला र फिल्म क्षेत्रका सम्मानित अनुहारहरूको विशेष उपस्थितिमा सम्पन्न भयो । फिल्म हेरेपछि निर्देशकदेखि कलाकार, संचारकर्मी, सुरक्षाकर्मी, गीतकार, समाजसेवीसम्मले फिल्मले दिएको सन्देश र भावनात्मक गहिराइको खुलेर प्रशंसा गरे ।
वरिष्ठ निर्देशक तुलसी घिमिरेले फिल्मले नयाँ पुस्तालाई मात्र होइन, अहिलेको पुस्तालाई समेत नेपाली भाषाप्रति जिम्मेवार बनाउने प्रेरणा दिएको बताए । कलाकार राजाराम पौडेलले फिल्म सम्पूर्ण नेपालीका लागि हेर्नैपर्ने भएको उल्लेख गरे भने निर्देशक अशोक शर्माले दर्शकको मन जित्नेमा विश्वस्त रहेको बताए । लोकगायिका ज्योति मगर, संचारकर्मी सुशील नेपाल, लोकगायक बद्री पंगेनी, निर्देशक राजेन्द्र सलभ, नृत्य निर्देशक कमल राई, कलाकार संघ अध्यक्ष मोहन निरौला, निर्देशक समाज अध्यक्ष जनकदीप पराजुली, पूर्व सांसद महेन्द्र लिम्बु लगायत धेरैले फिल्मको राष्ट्रियताको भावना र भाषिक सौन्दर्यको सराहना गरे ।
मुख्य कलाकारहरू विजय बराल, रोशन श्रेष्ठ, विल्सन विक्रम राई, आयुशा समाल र बुद्धि तामाङ लगायत सबै प्रिमियरमा उपस्थित थिए । दर्शकको उत्साहले फिल्मको सफलता प्रति उनीहरू आशावादी देखिए । निर्देशक मित्र प्रधान (नर) ले फिल्मप्रति आएको उत्साहजनक प्रतिक्रिया आफ्नो लागि ठूलो ऊर्जा भएको भन्दै सम्पूर्ण नेपाली दर्शकलाई हलमा गएर फिल्म हेर्न र समर्थन गर्न आग्रह गरे । अमेरिकाबाट समाजसेवी तथा गीतकार पाँचम तामांग समेत फिल्म हेर्न विशेष रूपमा नेपाल आएका थिए ।
@parikalanewsofficial
इश्वर इन्टरटेन्मेन्ट प्रालिको प्रस्तुतिमा बनेको फिल्ममा ज्ञान बहादुर प्रधान (रोशन) निर्माता छन् भने शिवम् अधिकारीको लेखन, सौरभ लामाको छायांकन, देव महर्जनको द्वन्द्व निर्देशन, समिर मियाको भिएफएक्स, र बनिश शाहको सम्पादन रहेको छ । संगीतमा दिपक शर्मा, विकास चौधरी, थोरम्पो ह्यङ राई, र शब्दमा विल्सन विक्रम राई, शंकर अधिकारी घायल, अनिश अधिकारीको कलात्मक प्रस्तुति रहेको छ । फिल्मलाई आर आर फिल्म्सले वितरण गर्दैछ ।
Discussion about this post