ऋचा शर्मा ‘जदौ’ मा अनुबन्धित: फिल्मको कलाकार सूची बलियो बन्दै

इटहरी/ नेपाली फिल्म ‘जदौ’मा अब अभिनेत्री ऋचा शर्माको पनि प्रवेश भएको छ । निर्माण टिमले ऋचालाई एक महत्वपूर्ण भूमिकामा अनुबन्धित गरेको घोषणा गरेको हो । यसअघि नै यो फिल्ममा मुकुन भुसाल र नीति शाह जस्ता कलाकारहरू जोडिसकेकाले ‘जदौ’ को कलाकार सूची झनै सशक्त बनेको छ ।

निर्माण पक्षका अनुसार, फिल्ममा केही अन्य प्रमुख कलाकारहरू जोडिन बाँकी नै छन् । ऋचा शर्मा यस फिल्ममा दर्शकले पहिले कहिल्यै नदेखेको बिल्कुलै फरक अवतारमा देखिने बताइएको छ, जसले उनको भूमिकाप्रति थप कौतुहलता जगाएको छ ।

काजी लिम्बूको लेखन रहेको यो फिल्म सिल्भर स्क्रिन इन्टरटेन्मेन्ट र समिश्रण मुभिज एण्ड इन्टरटेन्मेन्टको संयुक्त प्रस्तुति हो । रामराजा सुवेदी, ओम चेम्जोङ, शान्ता तामाङ र नारायण शास्त्री सहनिर्माताका रूपमा रहेका छन् । फिल्मको निर्माण व्यवस्थापन बुद्धि माझीले सम्हालेका छन् । ‘जदौ’ को छायांकन आगामी भदौ महिनाको पहिलो सातादेखि सुरु हुनेछ ।

@parikalanewsofficial

फिल्मका दृश्यहरू दाङ र प्युठान जिल्लाका विभिन्न रमणीय स्थलहरूमा कैद गरिनेछन् । प्युठान क्षेत्रको निर्माण व्यवस्थापनको जिम्मा लछुमन भण्डारीले लिएका छन् । फिल्ममा बाबुल गिरीको संगीत सुन्न सकिनेछ । सिल्भर स्क्रिनकी प्रबन्ध निर्देशक बिमला भण्डारीले फिल्मका निर्देशक, बाँकी कलाकार र प्राविधिकबारे चाँडै विस्तृत जानकारी गराइने बताएकी छिन् ।