रोहितको ‘भाइटीका’मा विपिन कार्कि मुनाफा साझेदारको रुपमा अनुबन्ध

इटहरी/ नेपाली फिल्ममा नयाँ अभ्यासका रूपमा अभिनेता विपिन कार्कीले पारिश्रमिक होइन, मुनाफा साझेदारका रूपमा नयाँ फिल्म ‘भाइटीका’मा सहमति जनाएका छन् । निर्माता रोहित अधिकारीको प्रस्तुति रहने यो फिल्ममा कार्कीले शीर्ष भूमिका निर्वाह गर्दैछन् । कथाले मन छोएकाले उनले स्क्रिप्ट लेखनको चरणदेखि नै संलग्न हुन तत्परता जनाएका हुन् ।

निर्माता अधिकारीका अनुसार, “कथाले विपिनजीलाई जीवन्त महसुस गरायो । त्यसैले उहाँले सबै काम छाडेर पनि स्क्रिप्टमा बस्न तयार हुनुभयो र मुनाफाको राम्रो हिस्सा पनि स्वीकार गर्नुभयो ।” बीस वर्षदेखि दाइबाट टीका नलगाएको बहिनीको कथामा आधारित फिल्ममा विपिनले दाइको भूमिका निभाउने छन् । ‘ऊनको स्वीटर’को सफलता पछिको यो उनको अर्को भावनात्मक प्रोजेक्ट हुनेछ ।

फिल्मको निर्देशन दीपक वलीले गर्नेछन् भने पटकथा लेखनमा महेश दवाडी हुनेछन् । अन्य कलाकारहरूको छनोट अझै बाँकी रहेको जानकारी रोहितले गराए । २०८२ साल भित्रै छायांकन सुरु हुने तयारीमा रहेको ‘भाइटीका’ २०८३ सालको तिहारमा प्रदर्शन गर्ने लक्ष्य राखिएको छ । अभिनेता कार्की यसअघि फिल्म ‘काजी’को छायांकनमा व्यस्त छन् र त्यसपछि उनी ‘भाइटीका’तर्फ लाग्नेछन् । निर्माता अधिकारीको अर्को बहुप्रतीक्षित फिल्म ‘माइतीघर’ यस वर्षको दशैंको फूलपातीमा प्रदर्शन हुने तयारीमा छ ।

@parikalanewsofficial