कञ्चन रिमालले पार गरिन् ‘सारेगमप लिटिल च्याम्प्स नेपाल सिजन २’ को मेघा अडिसन

इटहरी/ तेर्हथुममा जन्मिएर हाल स्थायी रुपमा परिवार सहित ईटहरीमा बसोबास गर्दै अध्ययनरत बालगायिका कञ्चन रिमालले लोकप्रिय गायन रियालिटी शो ‘सारेगमप लिटिल च्याम्प्स नेपाल सिजन २’ मा उत्कृष्ट यात्रा तय गरिरहेकी छन् । आइतबार प्रशारण भएको शोको पाँचौं एपिसोडमा उनले दमदार प्रस्तुति दिँदै मेघा अडिसन पार गरेकी छन् ।

उनको लागि डिजिटल अडिसन हुँदै अडिसन राउन्डसम्मको यात्रा सजिलो भने रहेन । अडिसन चरणदेखि नै उनी स्वास्थ्य समस्याले ग्रसित थिइन् । तर पनि उत्कृष्ट प्रस्तुति दिन उनको गायन क्षमताले कुनै सम्झौता गरेन । मेघा अडिसनकै समयमा पनि उनी अस्वस्थ थिइन्, तर कालजयी गीत “आँखा छोपी नरोउ भनी भन्नु पर्या छ” प्रस्तुत गर्दा ग्रान्ड जुरीहरुबाट उनले ८७ अंक प्राप्त गरिन् । त्यसकै आधारमा उनी अर्को चरणमा प्रवेश गर्न सफल भइन् ।

@parikalanewsofficial

यस्तै निर्णायकहरू दिप श्रेष्ठ, सुवानी मोक्तान र स्वप्न सुमन पनि उनको प्रस्तुती देखेर मख्ख थिए । निर्णायक सुवानिले उनको खुलेर प्रसंशा गरिन् । १५ वर्ष मुनिका प्रतिभावान बालबालिकाको सहभागिता रहेको यस फ्रेन्चाइज कार्यक्रमबाट यसपटक विजेताले विद्युतीय कार (बीएडब्लु ब्रम्बी) पुरस्कार स्वरूप जित्नेछन्, जुन नेपाली रियालिटी शोको इतिहासमै पहिलो पटक बालप्रतिभाले यस प्रकारको उपहार प्राप्त गर्दैछन् ।

यो कार्यक्रमको सञ्चालन सुमन कार्कीले गरिरहेका छन् भने निर्देशक एलिन श्रेष्ठ रहेका छ । नोबडी प्रोडक्सनद्वारा निर्मित ‘सारेगमप लिटिल च्याम्प्स नेपाल सिजन २’ डोको युट्युब च्यानल र स्पेस ४के टेलिभिजनमार्फत हरेक आइतबार र सोमबार राति ८:३० बजे प्रसारण हुँदै आएको छ ।