‘जदौ’ मा मुकुन भुसाल अनुबन्धित

इटहरी/ नेपाली फिल्म छेत्रमा नयाँ प्रोजेक्टहरूको लहर चलिरहेका बेला अर्को एउटा रोमाञ्चक खबर बाहिरिएको छ। फिल्म ‘जदौ’ मा अभिनेता मुकुन भुसाल को प्रवेश पक्का भएको छ। यो सामाजिक सन्देश बोकेको अन्तरजातीय प्रेमकथामा आधारित फिल्ममा उनले अभिनेत्री साम्राज्ञी आरएल शाह सँग स्क्रिन शेयर गर्नेछन्।’जदौ’ को कथा प्रेमको वरिपरि घुमे पनि यो कुनै सामान्य प्रेमकथा भने होइन। जातीय बन्धन र सामाजिक दबाबका कारण उत्पन्न हुने जटिलताहरूलाई यसले गहिराइमा प्रस्तुत गर्नेछ। यो फिल्मले दर्शकको मन छुने र समाजमा नयाँ बहस सिर्जना गर्ने अपेक्षा गरिएको छ।

फिल्मको लेखन, परिकल्पना र निर्माणको जिम्मेवारी काजी लिम्बू ले लिएका छन्। यद्यपि, फिल्मको निर्देशन कसले गर्ने भन्ने कुरा भने अझै खुलाइएको छैन, जसले दर्शकमा थप कौतुहलता जगाएको छ। यसैबीच, अभिनेत्री सन्ध्या श्रेष्ठ पनि फिल्मको कलाकार सूचीमा जोडिएकी छन्, जसले कथालाई अझै सशक्त बनाउने देखिन्छ।

सिल्भर स्क्रिन र सम्मिश्रण मुभिजको संयुक्त लगानीमा बन्ने यो फिल्मको सहनिर्माताको रूपमा रामराजा सुवेदी, ओम चेम्जोङ र शान्ति तामाङ रहेका छन्।‘जदौ’ को छायाङ्कन आउँदो भदौ महिनाबाट सुरु हुनेछ।अब निर्देशक को बन्छन् र मुकुन र साम्राज्ञीको अनस्क्रिन केमेस्ट्री कस्तो देखिन्छ भन्ने हेर्न दर्शकले केही समय कुर्नुपर्नेछ। तर एउटा कुरा पक्का छ 'जदौ’ ले जात, समाज र प्रेमबीचको जटिल समीकरणलाई बेजोड तरिकाले प्रस्तुत गर्नेछ।

@parikalanewsofficial