‘बिगुल’को चितवन छायांकन धमाधम

इटहरी/ निर्देशक रमेश कोइरालाको नयाँ फिल्म ‘बिगुल’ को चितवन सेड्युलको छायांकन लगभग सकिएको छ। वैशाखको अन्तिम साताबाट सुरु भएको यो सामाजिक कथावस्तुमा आधारित फिल्मको अधिकांश काम चितवनका विभिन्न रमणीय स्थलमा पूरा भइसकेको छ।निर्देशक कोइरालाका अनुसार, यतिबेलाको अत्यधिक गर्मीको बाबजुद पनि छायांकन तोकिएको समयमै र सहज रूपमा अघि बढेको छ। अब फिल्मका दुईवटा गीत र केही बाँकी दृश्यहरूका लागि सम्पूर्ण युनिट काठमाडौं सर्नेछ।

दिनेश कोइरालाको लेखन रहेको ‘बिगुल’ ले दर्शकलाई मनोरञ्जनका साथै एउटा महत्त्वपूर्ण सामाजिक सन्देश दिने उद्देश्य राखेको छ। फिल्ममा बेनीशा हमाल, नरेन खड्का, बिनोद न्यौपाने, नीर शाह, रविन्द्र खड्का, रमेश बुढाथोकी, गीता अधिकारी, सरोज खनाल, शिसिर वाङ्देल, ईश्वरी बराल लगायतका अनुभवी कलाकारहरूसँगै मिरा पण्डित नवअभिनेत्रीका रूपमा मुख्य भूमिकामा छिन्।म्याग्नोलिया ग्रुपको ब्यानरमा निर्माण भइरहेको यो फिल्मका निर्माताहरू महेश कोइराला र सूर्यकान्त कोइराला हुन्, भने कल्पना पौडेल प्रस्तुतकर्ताका रूपमा रहेकी छिन्।

कांग्रेस महामन्त्री विश्वप्रकाश शर्मा, अर्जुन पोखरेल र मनोज चौलागाईंको संगीत रहेको ‘बिगुल’ का गीतहरूलाई कमल राई र कविराज गहतराजले कोरियोग्राफी गरेका छन्। शिव ढकालको छायांकन, एनबी महर्जनको द्वन्द्व निर्देशन, मौनता श्रेष्ठको पटकथा तथा श्याम केसीको निर्माण व्यवस्थापन रहेको ‘बिगुल’ लाई निर्माण पक्षले २०८२ भित्रै प्रदर्शनमा ल्याउने योजना बनाएको छ।

@parikalanewsofficial