सहकारी ठगीको कथा पस्किने ‘महाभोज’को ट्रेलर सार्वजनिक, जेठ १५ मा रिलिज हुँदै

काठमाडौं/ समाजमा व्याप्त सहकारी संस्थागत विकृति र त्यसबाट पीडित आम नागरिकको मार्मिक कथालाई पर्दामा उतार्ने जमर्को गरेको नेपाली कथानक फिल्म ‘महाभोज’को बहुप्रतिक्षित ट्रेलर सार्वजनिक भएको छ । यही जेठ १५ गते देशव्यापी प्रदर्शनको तयारीमा रहेको यस फिल्मको ट्रेलर आइतबार काठमाडौंमा एक कार्यक्रमका बीच रिलिज गरियो ।
काठमाडौको क्युएफएक्स सिनेमा–राइजिङ मलमा आयोजित ट्रेलर सार्वजनिक समारोहमा करिब साढे चार मिनेट लामो ट्रेलर प्रदर्शन गरिएको थियो ।

ट्रेलरले विशेषगरी सहकारी प्रणालीभित्र मौलाएको ठगी, आम बचतकर्ताले भोग्नुपरेको सास्ती र त्यसले निम्त्याएको भयावह स्थितिलाई सशक्त ढंगले चित्रण गरेको छ । ट्रेलरमा पैसा फिर्ता नपाएर औषधि उपचारबाट वञ्चित हुँदै ज्यान गुमाउन पुगेका निमुखा जनताको त्रासदी, सहकारीका कर्मचारीको मनोवैज्ञानिक द्वन्द्व र राजनीतिक आवरणमा हुने चलखेलको दम्भलाई स्पष्ट रूपमा देखाइएको छ । दैनिक ज्याला मजदुरीबाट जोगाएको सानो रकम समेत डुब्दा उत्पन्न हुने सामाजिक असमानता र केही पहुँचवाला व्यक्तिले कसरी सोझासाझाको पैसा दुरुपयोग गरी विलासी जीवन बिताइरहेका छन् भन्ने कटु यथार्थलाई ट्रेलरले निर्भीकतापूर्वक उजागर गरेको छ । हेर्नुस् ट्रेलर ।

फिल्ममा दयाहाङ राई, आर्यन सिग्देल, खगेन्द्र लामिछाने, अञ्जना बराइली, मलिका महत, गौमाया गुरुङ, वसुन्धरा भुसाल र मोहन निरौला लगायतका स्थापित कलाकारहरूको प्रमुख भूमिका रहेको छ । ट्रेलरको अन्त्यमा भित्तामा लेखिएको ‘सत्य कहिल्यै लुक्दैन’ भन्ने वाक्यले फिल्मले न्याय र सत्यको पक्षमा आवाज उठाउने सङ्केत गर्दछ । यो भनाइ फिल्म प्रदर्शनको मिति नजिकिँदै गर्दा कलाकारहरूले सामाजिक सञ्जालमा पोस्ट गरी दर्शकमाझ उत्सुकता पैदा गर्न सफल भएका थिए ।

विकास सुवेदीको कथा तथा पटकथा रहेको यो फिल्म क्लक वर्क क्रियशन र पिक्चर फ्रेमको संयुक्त निर्माणमा बनेको हो । फिल्ममा दयाहाङ राई, आर्यन सिग्देल, खगेन्द्र लामिछाने, अञ्जना बराइली, गौमाया गुरुङ, मलिका महत, वसुन्धरा भुसाल, मोहन निरौलाका साथै बुद्धि तामाङ, कमलमणि नेपाल, पुष्कर गुरुङ, विनोद न्यौपाने, आभा अर्याल, वीरेन्द्र सिंह कुशवाह लगायतका अन्य कलाकारहरूको पनि अभिनय रहेको छ ।