इटहरी/ नेपाली रङ्गीन दुनियाँमा टिभि सिरियलमा अभिनय गर्दै अहिले कहलिएका अभिनेताको उपमा पाएका अभिनेता सविन श्रेष्ठ “परिवर्तन नेपाल चलचित्रकर्मी सम्मान २०८१” बाट सम्मानित भएका छन् । २०५३ सालमा स्थापना भएको ‘परिवर्तन नेपाल’ले जेठ १ गते काठमाण्डौमा एक विशेष कार्यक्रमको आयोजना सहित उनलाई टेलिचलचित्र हुँदै ठूलो पार्दासम्मको सफल यात्रा पार गर्दै नेपाली कला संस्कृति, फिल्म क्षेत्रमा र पेशाकर्मीको उत्थानमा महत्त्वपूर्ण योगदान गरेको भन्दै यो सम्मान गरेको हो ।
विक्रम संवत् २०६० सालबाट नेपाल टेलिभिज र युनिसेफको संयुक्त लगानीमा निर्माण तथा प्रसारण भएको “क्याटमान्डू” नामक टेलिसिरियलबाट उनले अभिनय यात्रा थालनी गरेका थिए । त्यसपश्चात “घरबेटी बा”, “कलेज” जस्ता टेलिसिरियल खेल्दै उनले “अन्दाज” फिल्मबाट ठूलो पर्दाको फिल्ममा डेब्यु गरे । छविराज ओझाले निर्माण गरेको सो फिल्ममा उनले नायकको रुपमा अभिनेत्री रेखा थापासंग स्क्रीन शेयर गर्ने मौका पाए ।
दर्जनौ म्युजिक भिडियोमा पनि मोडलिङ्ग गरिसकेका सविनले झण्डै साढे २ दर्जन फिल्ममा नायकको भूमिकामा काम गरिसकेका छन् भने आधा दर्जन प्रतिष्ठित अवार्ड हात पारिसकेका छन् । हाल उनी कलाकारहरूको छाता संगठन ‘नेपाल चलचित्र कलाकार संघ’को केन्द्रीय महासचिव रहेर काम गरिरहेका छन् । यस्तै नयाँ फिल्मको तयारीमा रहेका सविनले यतिबेला उक्त अनटाईटल फिल्मको प्रि प्रोडक्सनको काम गरिरहेका छन् । बुझिएअनुसार उनले सोही फिल्मका लागि लुक्स र ज्यान बनाइरहेका छन् ।
@parikalanewsofficial
Discussion about this post