प्रदर्शन अगावै ‘नरसिंहाः अवतार’मा राज र सनिशाको संवादले कमायो चर्चा

काठमाडौं/ फिल्म प्रदर्शनमा आउनु अगावै त्यसको कुनै संवादले दर्शकमाझ छुट्टै प्रभाव जमाउन सक्नु चानचुने कुरा होइन । यस्तै सुखद संयोग मिलेको छ आगामी जेठ ९ गतेबाट प्रदर्शनमा आउन लागेको नेपाली फिल्म ‘नरसिंहाः अवतार’लाई । यो फिल्मको ट्रेलरमा समावेश एउटा प्रेमिल संवादले यतिबेला सामाजिक सञ्जाल, विशेषगरी टिकटकमा तहल्का मच्चाइरहेको छ ।

फिल्मका नायक राज कटुवाल र नायिका सनिषा भट्टराईबीचको प्रेमिल संवाद “कोही मान्छे यति खास हुन्छन् कि जसलाई सास रहुन्जेलसम्म पनि विर्सन सकिदैन । तिमीलाई विर्सिएर कसरी सास फेर्नु” र त्यसको जवाफमा सनिषाले सोधेको “को हौं तिमी मेरो” भन्ने प्रश्नले टिकटक प्रयोगकर्तालाई आकर्षित गरेको छ । अहिले यो संवादमा टिकटक बनाउनेहरुको संख्या उल्लेख्य देखिन्छ ।

दिवाकर भट्टराईको लेखन तथा निर्देशनमा तयार भएको यो फिल्म एक्सन, प्रेम, विछोड, वियोग, सस्पेन्स र थ्रीलरको मिश्रित कथावस्तुमा आधारित छ । ट्रेलर सार्वजनिक भएसँगै नायक राज कटुवालको एक्सन अवतारले पनि दर्शकबाट प्रशंसा बटुलिरहेको छ । फिल्मको संवादले पाएको चर्चाबाट नायक राज र नायिका सनिषा दुवै दंग छन् ।

@parikalanewsofficial

उनीहरुले फिल्मभित्र आफ्नो प्रेम सम्बन्धलाई बेग्लै र विशेष शैलीमा प्रस्तुत गरिएको र दर्शकले त्यसलाई पक्कै मन पराउने विश्वास व्यक्त गरेका छन् । नेम महर्जन, नरेन्द्र महर्जन, दीपक ढकाल र ध्रुव न्यौपाने निर्माता रहेको यस फिल्मले बक्स अफिसमा सुखद सुरुवात गर्ने अपेक्षा गरिएको छ । फिल्ममा राजेश हमाल, राज कटुवाल, नीति शाह, सनिषा भट्टराई, निर शाह, प्रशान्त ताम्राकार, राजिभ जंग बस्नेत, रमेश चन्द सोडारी, दीपा शाही लगायतका स्थापित तथा नयाँ कलाकारहरुको अभिनय देख्न सकिनेछ ।