कोशी प्रदेशमा ‘उनको स्वीटर’ भव्य ओपनिङको संकेत, दर्शकको उत्साहजनक अग्रिम बुकिङ

इटहरी/ भोलि अर्थात वैशाख २६ गतेदेखि प्रदर्शनमा आउन लागेको बहुप्रतिक्षित नेपाली फिल्म ‘उनको स्वीटर’ ले कोशी प्रदेशमा शानदार सुरुवात गर्ने देखिएको छ । पूर्वी नेपालको पाँचथरको रमणीय परिवेशमा आधारित यो सामाजिक कथानक फिल्मले प्रेम र मानवीय सम्बन्धको न्यानो कथा प्रस्तुत गर्ने बताइएको छ ।धरान, इटहरी, दमक र विर्तामोडका फिल्म हलहरूले भोलिका लागि निर्धारण गरेको २० भन्दा बढी शोहरूमध्ये केही शो आजै हाउसफुलको नजिक पुगेका छन् भने अधिकांशमा अग्रिम बुकिङ उत्साहजनक रहेको छ ।

प्राप्त जानकारी अनुसार, धरानस्थित फ्रेन्ड्स सिनेमाको दिउँसो १:१५ बजेको शोलाई “विशेष शो” को रूपमा आयोजना गरिने भएको छ, जहाँ आमन्त्रित अतिथिहरूको उपस्थिति रहनेछ । यता, इटहरीमा सञ्चालनमा रहेको एकमात्र फिल्म हल, इलाइट सिनेमाले ‘उनको स्वीटर’ लाई एउटा मात्र शो उपलब्ध गराएको भएता पनि उक्त शो लगभग हाउसफुलको संघारमा पुगेको छ । हल सञ्चालकहरूले दर्शकहरूको मागलाई मध्यनजर गर्दै शो थप्ने तयारी गरिरहेको बताइएको छ ।

@parikalanewsofficial

नविन चौहानद्वारा लिखित तथा निर्देशित यो फिल्म आर्टमाण्डु प्रोडक्सनको पहिलो फिचर फिल्म हो । फिल्ममा विपिन कार्की र मिरुना मगरले मुख्य भूमिका निभाएका छन् । साथै, फिल्ममा सुनिल पोखरेल, माओत्से गुरुङ, विल्सन विक्रम राई, प्रेम सुब्बा, एलेक्स (पारस), परीक्षा लिम्बू लगायतका कलाकारहरूको पनि सशक्त अभिनय रहेको छ ।

फिल्मको कथा पाँचथरबाट सुरु भई भारतको पश्चिम बंगालको सीमासम्म पुग्छ । फिल्मले नेपालको सांस्कृतिक विविधता, सामाजिक परिवेश र दैनिक जीवनका रंगहरूलाई समेट्ने प्रयास गरेको निर्देशक चौहानले बताएका छन् । प्रदर्शनअघि सार्वजनिक भएका फिल्मका गीतहरू ‘फूल’, ‘मखमली’ र ‘काफ्ले’ ले दर्शकहरूको मन जितिसकेका छन् । सुजन चापागाईं र झुमा लिम्बूको संगीत रहेको यी गीतहरूले फिल्मप्रति दर्शकहरूको उत्सुकतालाई थप बढाएको छ । ‘उनको स्वीटर’ ले प्रदर्शनअघि नै पाएको यो सकारात्मक प्रतिक्रिया र दर्शकहरूको उत्साहजनक अग्रिम बुकिङले फिल्मको सफलताको बलियो संकेत गरेको छ ।