‘महाभोज’ गीत: मलिका महतको बिहेमा गीत गाउँदै छमछमी नाचे निश्चल बस्नेत

इटहरी/ यही आउँदो जेठ १५ गते देखि प्रदर्शनको मिति घोषणा गरेको नेपाली फिल्म ‘महाभोज’ यतिबेला चर्चामा छ । दर्शकमाझ प्रतीक्षित बनेको यस फिल्मको गीत ‘लालुमै’ आइतबार एक विशेष कार्यक्रमका बिच सार्वजनिक गरिएको छ । काठमाडौमा गरिएको गीत लञ्च कार्यक्रममा फिल्म निर्माण टिमका सदस्यहरू, कलाकारहरू र सञ्चारकर्मीहरूको उल्लेख्य उपस्थिति थियो ।

निर्देशक तथा अभिनेता निश्चल बस्नेत र लोकप्रिय गायिका अस्मिता अधिकारीको सुमधुर आवाजमा सजिएको ‘लालुमै’ गीतमा हर्क साउदको मर्मस्पर्शी शब्दहरू रहेका छन् । गीतमा कोसिस क्षेत्री र केतन क्षेत्रीको सङ्गीत, पुष्कर खत्रीको एरेञ्ज र केतन क्षेत्रीकै रेकर्ड प्रोडक्सन रहेको छ । गीतको भिडियोमा फिल्मका मुख्य कलाकारहरू दयाहाङ राई, खगेन्द्र लामिछाने, अञ्जना बराइली, मलिका महत, गौमाया गुरुङ, र गीतका एक गायक निश्चल बस्नेत स्वयंले आकर्षक नृत्य प्रस्तुत गरेका छन् ।

कोरियोग्राफर सुनिल क्षेत्रीको निर्देशनमा तयार पारिएको भिडियोले दर्शकको मन जित्न सफल भएको छ । विशेष गरी, भिडियोमा मलिका महतको बिहे समारोहको रमाइलो माहोल कैद गरिएको छ । जहाँ परिवार, साथीभाइ र गाउँलेको उपस्थितिमा खुसीयाली साटिएको देख्न सकिन्छ । मोडल कमल सिंहले भिडियोमा मलिका महतसँग बिहे गर्दै गरेको भूमिकामा विशेष उपस्थिति जनाएका छन् । हेर्नुस् भिडियो ।

गीत सार्वजनिक कार्यक्रममा फिल्मका निर्देशक दिनेश राउतले ‘महाभोज’ले नेपाली समाजमा गहिरो जरा गाडेको वर्ग सङ्घर्ष र पैसाले मानिसको सम्बन्ध र नैतिकतामा पार्ने दबाबको यथार्थ चित्रण गर्ने बताए । उनले फिल्मले दर्शकलाई सोच्न बाध्य पार्ने कथा प्रस्तुत गर्ने दाबी गरे । कार्यक्रममा उपस्थित कलाकारहरूले फिल्म छायाङ्कनका क्रममा भोगेका रमाइला अनुभवहरू बाँडे । अभिनेता दयाहाङ राई र खगेन्द्र लामिछानेले आफूहरू पेशेवर नृत्यकार नभए पनि ‘महाभोज’ का गीतहरूमा खुलेर नाच्न पाएको अनुभव सुनाए ।

गायक तथा कलाकार निश्चल बस्नेतले निर्देशक दिनेश राउतसँगको पुनः सहकार्यलाई लिएर खुसी व्यक्त गरे । सन् २०१२ मा एकै समयमा निर्देशनमा पाइला चालेका निश्चल र दिनेशले यसअघि सन् २०१७ मा ‘पर्व’ फिल्मको हिट गीत ‘काले दाइ’ मा पनि सहकार्य गरेका थिए, जहाँ निश्चलले स्वर दिनुका साथै नृत्य गरेका थिए । क्लॉक वर्क क्रियशन र पिक्चर फ्रेमको संयुक्त ब्यानरमा निर्माण भएको ‘महाभोज’ का निर्माता हिमाल कडरिया हुन् । फिल्मको कथा र पटकथा सुवेदीले तयार पारेका हुन् ।

@parikalanewsofficial

‘महाभोज’ नेपालसहित विश्वका विभिन्न देशहरूमा एकै दिन प्रदर्शनमा आउने तयारीमा छ । फिल्ममा आर्यन सिग्देल, दयाहाङ राई, खगेन्द्र लामिछाने, अञ्जना बराइली, गौमाया गुरुङ, मलिका महत, वसुन्धरा भुसाल, मोहन निरौला, बुद्धि तामाङ, कमलमणि नेपाल, पुष्कर गुरुङ, विनोद न्यौपाने, आभा अर्याल, र वीरेन्द्र सिंह कुशवाह लगायत थुप्रै कलाकारहरूको अभिनय देख्न सकिनेछ । ‘लालुमै’ गीतको सार्वजनिकसँगै ‘महाभोज’ प्रति दर्शकको अपेक्षा झनै चुलिएको छ ।