फिल्म ‘जलाकी’मा धीरज मगरको इन्ट्री, पुनः उपासना र धीरज एकसाथ देखिँदै

इटहरी/ गत वर्षको सफल फिल्म ‘खुस्मा’बाट चर्चा कमाएका निर्देशक अशोक थापा मगरले आफ्नो नयाँ फिल्म ‘जलाकी’को निर्माण कार्य सुरु गरेका छन् । यस फिल्ममा लोकप्रिय अभिनेता धिरज मगरको प्रवेशले थप चर्चा पाएको छ । ‘खुस्मा’मा सहकार्य गरेका निर्देशक अशोक र अभिनेता धिरजको यो दोस्रो सहकार्य हो ।

केही अघिदेखि बागलुङको प्रसिद्ध कालिका मन्दिरबाट शुभसाइत गर्दै फिल्मको छायांकन प्रारम्भ गरिएको थियो । निर्माण टोलीका अनुसार पहिलो चरणको छायांकन सफलतापूर्वक सम्पन्न भइसकेको छ । अभिनेता धिरज मगरले भने दोस्रो चरणको छायांकन सुरु भएपछि मात्र फिल्मको सेटमा पाइला टेक्ने निर्देशक अशोकले जानकारी दिए । ‘जलाकी’ लाई त्रिकोणात्मक प्रेम कथामा आधारित फिल्म रहने बताइएको छ ।

धिरज मगरसँगै यसमा सोनम तोप्देन, उपासना सिंह ठकुरी, अस्तित्व भट्टचन र आकृति राजभण्डारीको मुख्य अभिनय रहनेछ । मोडल आकृति राजभण्डारीले यसै फिल्मबाट नेपाली फिल्म उद्योगमा मा डेब्यु गर्दैछिन् । फिल्मको शीर्षक ‘जलाकी’ ले मगर समुदायमा विशेष सांस्कृतिक महत्व राख्छ । यो शब्दले कसैको सम्झना, माया र आस्थाको प्रतीकको रूपमा ढुंगाले बनाइएको स्तम्भलाई जनाउँछ । फिल्मले मगर र गुरुङ समुदायको संस्कृतिलाई पर्दामा उतार्ने निर्माण टीमको भनाइ छ ।

@parikalanewsofficial

एम मिडिया प्रालीको ब्यानरमा निर्माण भइरहेको ‘जलाकी’ को छायांकन तीन चरणमा हुनेछ । यसका लागि रुकुम, म्याग्दी, बागलुङ, पोखराका रमणीय स्थलहरूका साथै दक्षिण कोरियाका विभिन्न स्थानहरूलाई समेत छनोट गरिएको छ ।
फिल्मका निर्माताहरूमा ओम घर्तीमगर, वीर बहादुर लामा, चन्द्र बहादुर भट्टचन, बेताने मगर (बबिता राना), मान बहादुर धनाह मगर र सुस्मिता बुढाथोकी रहेका छन् । साथै, माओत्से गुरुङ, बुद्धि तामाङ, संगीता थापा मगर, राजु रेग्मी मगर, खड्क बहादुर पुन (खबपु) जस्ता कलाकारहरूको पनि अभिनय रहनेछ ।

प्राविधिक पक्षमा शैलेन्द्र डी कार्कीले छायांकन, राजु रेग्मी मगर लाइन प्रोड्युसर र महेश बराल मुख्य सहायक निर्देशकको रुपमा रहेका छन्। फिल्मको संगीत एसडी योगी र सरिता राईले तयार पार्दैछन् भने गीतको रचना सुरेन्द्र राना र राम अविरल विष्टले गरेका छन् । निर्देशक मगरको डेब्यु निर्देशन रहेको फिल्म ‘खुस्मा’मा समावेश ‘रुकुम मैकोट’ बोलको गीतले युट्युबमा छोटो समयमै अर्थात् ५ महिनामै दश करोड भ्युज प्राप्त गरी ऐतिहासिक रेकर्ड कायम गरेको थियो, जसले गर्दा ‘जलाकी’ प्रति दर्शकको अपेक्षा झनै बढेको छ ।