जेठ ९ गते रिलिज हुने ‘नरसिंहा अवतार’मा रमेश चन्द सोडारीको एक्सन अवतार

इटहरी/ निर्देशक दिवाकर भट्टराईको प्रतीक्षित एक्सन ड्रामा फिल्म ‘नरसिंहा अवतार’ यही आउने जेठ ९ मा रिलिज हुँदै छ । यो फिल्मका लागि गठिलो शारीरिक बनावट र रफ एण्ड टफ लुक्स भएका अभिनेताको खोजीमा रहेका थिए निर्देशक भट्टराई । त्यसैले लिड अभिनेतामा राज कटुवाल र अर्को प्रमुख भूमिकामा रमेश चन्द सोडारीलाई छनोट गरेका थिए ।

रमेश, जो मिक्स मार्सल आर्ट, तेक्वान्दो र सितेरियो कराँतेमा ब्ल्याक बेल्ट धारक हुन्, यो फिल्ममा उनी सकारात्मक भूमिकामा देखा पर्नेछन् । उनको जिम्न्यास्टिकमा दखल र दैनिक बिहान ४ बजे जिम र ८ देखि ११ बजेसम्म मार्सल आर्ट अभ्यास गर्ने बानीले उनलाई यो भूमिकाका लागि उपयुक्त बनाएको छ । “निर्देशकज्यूले मेरो फोटो देखेपछि मिटिङका लागि बोलाउनुभयो र स्क्रिप्ट सुनाउनुभयो । यो मेरो पहिलो बिग बजेट फिल्म हो, जसले मलाई निकै उत्साहित बनाएको छ,” रमेशले भने ।

‘नरसिंहा अवतार’लाई रमेशले एक्सन, रोमान्स र मनोरञ्जनको पूर्ण प्याकेजको रूपमा वर्णन गरेका छन् । “यो फिल्ममा दर्शकले सबै कुरा पाउनुहुनेछब। कथा, प्रस्तुति र एक्सनले दर्शकको स्वादलाई ध्यानमा राखिएको छ,” उनले थपे । अभिनयको हिसाबले रमेशको यो चौथो फिल्म हो । यसअघि उनले ‘मेहेन्दो’बाट नेपाली फिल्म क्षेत्रमा डेब्यू गरेका थिए, तर उक्त फिल्म रिलिज हुन सकेन । “त्यो टुटेको सपना थियो । त्यसले मलाई हरेक दिन मेहनत गर्न प्रेरित गर्छ,” उनले विगत सम्झँदै भने ।

@parikalanewsofficial

त्यसपछि ‘मन त परदेशी’, ‘साङ्लो’ र ‘वानर सेना’मा अभिनय गरेका उनले यी फिल्मलाई सिकाइको पाठशाला मानेका छन् । “अघिल्ला फिल्महरू मेरो कक्षा थिए, तर ‘नरसिंहा अवतार’ मेरो बोर्ड परीक्षा हो । म डिस्टिङ्सन ल्याउने आशामा छु,” उनले आत्मविश्वास व्यक्त गरे । लगभग एक दशकदेखि नेपाली फिल्म उद्योगमा संघर्षरत रमेशले कयौँ म्युजिक भिडियोमा पनि आफ्नो क्षमता देखाइसकेका छन् । “यो फिल्मले मेरो मेहनतको फल दिनेछ भन्ने विश्वास छ । दर्शकले मेरो पात्रलाई मन पराउनुहुनेछ,” उनले भने ।