इटहरी/ आगामी जेठ २ गते देशभर प्रदर्शन हुने तयारीमा रहेको कमेडी जनराको फिल्म ‘हेल्लो काँशीराम’को टिजर सार्वजनिक भएको छ । बुढासुव्वा डिजिटलको आधिकारिक युट्युब च्यानलमार्फत सार्वजनिक गरिएको २ मिनेट ४ सेकेण्ड लामो टिजरले देशको वर्तमान राजनीतिक अवस्था र त्यसमा देखिने बाह्य हस्तक्षेपलाई तिखो व्यङ्ग्यमार्फत प्रस्तुत गरेको छ ।
नयाँ वर्ष २०८२ को अवसर पारेर सार्वजनिक गरिएको टिजर हेर्दा नेपालका शासकहरूले विदेशी शक्तिलाई देवता मानेर पूजा गर्ने प्रवृत्तिको फिल्मले सशक्त कटाक्ष गरेको अनुमान लगाउन सकिन्छ । टिजरमा अभिनेता दिलीप रायमाझीलाई बेरोजगार युवाको भूमिकामा देखाइएको छ, जसले समग्र युवा वर्गको प्रतिनिधित्व गरेको छ । कमेडी मन पराउने दर्शकहरूका लागि यो फिल्म एक उत्कृष्ट खुराक बन्न सक्ने देखिन्छ । हेर्नुस् टिजर ।
रेडलाइन फिल्मस् प्रा.लीको प्रस्तुति रहेको यो फिल्म रिम विश्वकर्माद्वारा लिखित तथा निर्देशित हो । पि. वि. थापाले फिल्ममा लगानी गरेका छन् । अनुभवी निर्देशक विश्वकर्माले यसअघि ‘नेपाली वीर’, ‘सम्झिराख है’, र ‘रेलिमाई’ जस्ता मौलिक कथावस्तुमा आधारित फिल्म निर्देशन गरिसकेका छन् ।
फिल्ममा यम आलेको छायाङ्कन, मित्र डी. गुरुङको सम्पादन तथा रंग संयोजन रहेको छ । कलाकारहरूमा दिलीप रायमाझीसँगै सुरविर पण्डित, रामचन्द्र अधिकारी, शुशिल पोखरेल, उमेर राई ‘फुलन्देको आमा’, भगेरी डन, नवज्योती रसाइली, सुमन खाँण, अजय न्यौपाने, सरोज केसी, उमेश मायालु, र विवेश पुरी लगायतका कलाकारहरूको अभिनय रहेको छ ।
@parikalanewsofficial
एक समयकी चर्चित अभिनेत्री प्रियंका कार्कीको पनि यस फिल्ममा विशेष भूमिका रहेको बुझिएको छ, तर उनको भूमिकाबारे थप जानकारी दिइएको छैन । फिल्ममा कविराज गहतराजको नृत्य निर्देशन, शंकर महर्जनको द्वन्द्व निर्देशन तथा नरेन्द्र बियोगी र विपिन आचार्यको संगीत संयोजन रहेको छ ।
प्रताप दास, मेलिना राई, राजु परियार, किरण सुनार र अनिक गिरी जस्ता लोकप्रिय गायक-गायिकाले फिल्मका गीतहरूमा स्वर दिएका छन्, जसले फिल्मको संगीत पक्षलाई थप आकर्षक बनाएको निर्माण पक्षको दाबी छ । निर्माण टोलीले यसअघि नै फिल्मको फस्टलुक पोस्टर र प्रदर्शन मिति सार्वजनिक गरिसकेको छ । अब टिजर सार्वजनिक भएसँगै दर्शकहरू फिल्मप्रति थप उत्साहित हुने अपेक्षा गरिएको छ । निर्माण टोलीले छिट्टै फिल्मको गीतहरू पनि सार्वजनिक गर्ने तयारी गरिरहेको छ ।
Discussion about this post