इटहरी/ हिजो मङ्गलबार कीर्तिपुरमा एक विशेष समारोहबीच फिल्म ‘अभिमन्यु’को शुभमुहूर्त गर्दै छायांकन सुरु गरिएको छ । निर्माण टिमले पूजा र मुहूर्त सटसहित फिल्मको छायांकन औपचारिक रूपमा सुरु गरेको थियो । शुभमुहूर्तमा फिल्मका अधिकांश मुख्य कलाकारहरूको उपस्थिति रहेको थियो । मुहूर्त सँगै छायांकनमा निस्किएको फिल्म युनिटलाई निरन्तर १८ घण्टा छायांकन गरेको छ । फिल्मका निर्माता विनोद पौडेलले यो जानकारी गराएका हुन् ।
‘अभिमन्यु’मा गौमाया गुरुङ, सरिता गिरी, लक्ष्मी बर्देबा, शिशिर वाङ्देल र किरण श्रेष्ठजस्ता चर्चित कलाकारहरूले प्रमुख भूमिकामा रहने छन् । निर्माता विनोद पौडेलले कथा अनुसार बलियो र प्रभावशाली कलाकार टिम तयार गरिएको बताए । उनले थपे, ‘यो फिल्मले दर्शकलाई नयाँ कथा र गहिरो सन्देश दिनेछ।’ सर्वकालीन ब्लकबस्टर फिल्म ‘पूर्ण बहादुरको सारङ्गी’का निर्माता पौडेलको नेतृत्वमा बन्न लागेको यो फिल्म आगामी भदौ २७ गते रिलिज मिति तय गरिएको छ ।
सेभेन सिज सिनेमाको ब्यानरमा निर्माण हुने ‘अभिमन्यु’को थिम पोस्टरले चक्रव्यूह र पैसाको प्रलोभनबीचको संघर्षलाई संकेत गरेको छ । फिल्मको कथा पैसाको लोभमा फसेर चक्रव्यूहबाट बाहिर निस्कने प्रयास गर्ने एक व्यक्तिको संघर्षमा केन्द्रित रहेको बताइएको छ । फिल्मका निर्देशक सुशान्त गौतमका लागि यो पहिलो निर्देशकीय फिल्म हो ।
मुकेश खनालको लेखन र मदन थापाको क्रिएटिभ निर्देशनमा बन्न लागेको यो फिल्ममा शरद महतोको छायांकन रहेको छ ।थापाले यसअघि ‘बाटो : रोड टु डेथ’ निर्देशन गरिसकेका छन् । विनोद पौडेल र गुञ्जन गिरी मुख्य निर्माता रहेको फिल्ममा रमेश चौलागाई र हरि श्रेष्ठ सह-निर्माताको रूपमा जोडिएका छन् । ‘अभिमन्यु’ विश्वभर एकसाथ नेपाली र हिन्दी भाषामा रिलिज हुने निर्माण पक्षले जनाएको छ ।
Discussion about this post