इटहरी/ यतिबेला सफलताको साथ प्रदर्शन भइरहेको फिल्म ‘अञ्जीला’ विराटनगरमा विशेष छुटका साथ प्रदर्शन गरिने भएको छ । विराटनगर अवस्थित सिटी सिनेमा हलमा १०० मै यो फिल्म हेर्न मिल्ने सुविधा मिलाईएको हो । फिल्मका कार्यकारी निर्माता विनोद अग्रवालका अनुसार हलमा यो फिल्म प्रदर्शन रहुन्जेलसम्म विद्यार्थीहरुका लागि यो छुटको व्यवस्था मिलाईएको हो ।
दिउँसो २ बजे र साँझ ६ बजेको २ ओटा अञ्जीलाको शोमा आउने विद्यार्थी दर्शकले आफ्नो आइडी कार्ड देखाएर उक्त छुटमा हेर्न सक्ने कार्यकारी निर्माता अग्रवालले जानकारी गराए । यस्तै शिक्षकहरूको लागि पनि विशेष छुटको व्यवस्था गरिएको उनको भनाइ छ । विद्यार्थीहरुका लागि हलले व्यवस्था गरेको टिकट धेरै हुने र अञ्जीला हेर्न चाहेर पनि महँगो टिकटका कारण हेर्न नपाइरहेका विराटनगरका विद्यार्थीहरुले यो लाभ उठाउने अग्रवाललाई विश्वास व्यक्त गरे ।
गएको फागुन २९ गतेदेखि प्रदर्शनमा आएको यो बायोपिक फिल्मले यतिबेला धेरैलाई रुवाइरहेको छ । यो फिल्ममा नेपाल महिला राष्ट्रिय फुटबल टिमको कप्तान तथा गोल रक्षक एन्जिला तुम्बापो सुब्बाको खेल संघर्ष र सफलतालाई समेटिएको छ । हाल एन्जिला केहीदिनदेखि फिल्म ‘अञ्जीला’को दर्शक भेट्न देश दौडहामा छिन् । फिल्ममा उनी आफै प्रमुख भूमिकामा छिन् । मिलन चाम्सले निर्देशन गरेको यो फिल्म प्रदर्शनमा आएको तेश्रो हप्ता सम्ममा पनि नेपालका धेरै हलहरुमा हाउसफुलका साथ चलिरहेको छ ।
एन्जिलासँगै प्रेमकुमार श्रेष्ठ, सुनिल थापा, दयाहाङ राई, विजय बराल, सिर्जना सुब्बा, माओत्से गुरुङ, सुमीन गुरुङ, बुद्धि तामाङ लगायतका कलाकारहरूको समेत अभिनय रहेको छ ।फिल्मको साथसाथै यसमा समावेश गीत ‘रात किन हुन्छ हजुर’ सामाजिक सञ्जालमा भाइरल छ । थानेश्वर गौतम र शान्तिश्री परियारको स्वर रहेको यस गीतले दर्शकलाई भावुक बनाइरहेको छ । टिकटक, फेसबुक, युट्युबमा यो गीतमा आधारित विभिन्न भिडियोहरू बनेका छन् । जसले गर्दा पनि हलसम्म दर्शक तानिन सहयोग मिलेको बुझ्न सकिन्छ । यो फिल्मका निर्माता प्रेम कुमार श्रेष्ठ हुन् ।
Discussion about this post