सुशान्त केसीको स्वरमा फिल्म ‘कर्मा’को ‘पागल’ गीत, २४ घण्टा नपुग्दै ट्रेण्डिङमा

इटहरी/ फिल्म ‘कर्मा’ यही चैत २९ गते नेपाल र विदेशमा एकसाथ प्रदर्शनमा आउने तयारीमा छ । नयाँ वर्ष २०८२ को अवसर पारेर रिलिज हुन लागेको यस फिल्मको ‘पागल’ बोलको प्रेमिल गीत सार्वजनिक भएको छ । लोकप्रिय गायक सुशान्त केसीको स्वर, शब्द र संगीतमा तयार भएको यस गीतलाई सुशान्तकै युट्युब च्यानलमार्फत सार्वजनिक गरिएको हो । गीतको भिडियो युट्युवमा सार्वजनिकको २४ घण्टा नपुग्दै युट्युब ट्रेण्डिङ मा देखिएको छ । यो समाचार तयार गर्दै गर्दा भिडियो युट्युब ट्रेण्डिङ को म्युजिक क्याटोगरी अन्तर्गत ट्रेण्डिङ को ९ औँ स्थानमा पुगेको छ । यो उकालो लाग्ने क्रममा निरन्तर चलिरहेको छ भने २ लाख ७२ हजार बढी पटक हेरिएको छ ।

विपीन कार्की र उपासना सिंह ठकुरीको प्रेम भावलाई समेटेको गीतमा, प्रेमको गहिराइलाई सुशान्तले आफ्नै शैलीमा उतारेका छन् । एकअर्काप्रतिको भावनात्मक आकर्षणलाई गीतले जीवन्त बनाएको छ । गीत सार्वजनिक हुनु अगाडि नै यसको छोटो क्लिप फेसबुक सर्ट तथा रिल्समा राखिएको थियो, जसलाई दर्शकले अत्यधिक रुचाएका थिए । हेर्नुस् गीतको भिडियो ।

युवापुस्ताले मन पराउने खालको शब्द तथा संगीतका कारण निर्माण टिम यो गीतले राम्रो चर्चा पाउनेमा ढुक्क छ । ‘कर्मा’ फिल्मको लागि सुशान्तले गाएको यो पहिलो गीत हो । यसअघि थुप्रै चलचित्रबाट अफर आए पनि उनले फिल्मका लागि गीत गाएका थिएनन् । यस कारण पनि यो गीत उनका प्रशंसकहरूका लागि विशेष बन्ने अपेक्षा गरिएको छ । गीतको भिडियोमा फिल्मका मुख्य कलाकार विपीन कार्की र उपासना सिंह ठकुरी फिचर्ड छन् ।

साथै, फिल्मका विभिन्न दृश्यहरूसमेत भिडियोमा देख्न सकिन्छ । एक्सन, ड्रामा र सस्पेन्स जनरामा निर्माण भएको ‘कर्मा’लाई निर्देशक सौरभ चौधरीले निर्देशन गरेका छन् । फिल्ममा विपीन र उपासनासँगै मुकुन भुसाल, दिब्यदेब, सरिता गिरी, बेन बस्नेत, सुज्यान सिलवाल, अनिल बुढाथोकी, निर्मल शर्मालगायतको अभिनय रहेको छ । फिल्मको कथा निर्देशक चौधरी स्वयंले लेखेका हुन् भने, संगीत निर्देशन भाष्कर स्वाँरले गरेका छन् ।

कविराज गहतराजको कोरियोग्राफी, श्री श्रेष्ठको द्वन्द्व निर्देशन, निमेष श्रेष्ठको सम्पादन, समीर मियाको भिएफएक्स, उत्तम न्यौपानेको ब्याकग्राउण्ड स्कोर, शाहिल खानको टिजर-ट्रेलर निर्माण, विजय बश्यालको पब्लिसिटी डिजाइन र राजेन्द्र मोक्तानको कलर ग्रेडिङ रहेको छ । आर्टिस्टिक इन्टरटेनमेन्टको प्रस्तुति रहेको फिल्ममा वसन्त लम्सालको लगानी रहेको छ । साथै, फिल्मको अन्तर्राष्ट्रिय प्रदर्शन अधिकार सेभेन सिज सिनेमाले लिएको छ । निर्देशक चौधरीको अघिल्लो फिल्म ‘अगस्त्यः च्याप्टर १’ ले दर्शक र समीक्षकको राम्रो प्रतिक्रिया पाएको थियो ।