अनुहारमा चोट सहित फिल्म ‘एक्टर: टेक वान’मा देखिए प्रदिप खड्का

इटहरी/ फिल्म ‘एक्टर: टेक वान’को दोस्रो अफिसियल थिम पोस्टर आज सार्वजनिक भएको छ । यस पोस्टरमा प्रमुख भूमिकामा रहेका अभिनेता प्रदीप खड्कालाई देखाइएको छ । जहाँ उनी गम्भीर चोटपटक सहितको अवस्थामा छन् । उनको अनुहारभरि रगत र घाउको दृश्यले उनी हिंसात्मक घटनामा परेको संकेत गर्दछ । कालो टिसर्टमा देखिएका खड्काको पृष्ठभूमि कुनै होटेल वा पवको हुन सक्ने अनुमान गर्न सकिन्छ, तर यसको स्पष्टता भने छैन ।

पोस्टरको गहिराईले चलचित्रले भावनात्मक र गम्भीर कथा प्रस्तुत गर्ने सम्भावनालाई संकेत गर्दछ । तर, निर्माण टिमले कथाबारे कुनै जानकारी सार्वजनिक गरेका छैनन् । कात्तिक १५ गते रिलिज हुने यो फिल्ममा प्रदीप खड्कासँगै नवोदित अभिनेत्री दिव्या रायमाझी, आना शर्मा, राजवल्लभ कोइराला, दिव्य देव र सुशील सिटौला लगायत कलाकारको पनि अभिनय रहेको छ । खड्काले यसपटक आना र दिव्यासँग पहिलो पटक स्क्रिन सेयर गर्न लागेका हुन् भने अभिनेता दिलिप रायमाझीकि सुपुत्री दिब्या रायमाझीले यहि फिल्मबाट नेपाली फिल्ममा अभिनेत्रीको रुपमा डेब्यु गर्दैछिन् ।

‘एक्टर: टेक वान’ फिल्मको निर्देशन राजन भुसालले गरेका छन् भने थमन कुमार भण्डारी निर्माता हुन् । कथा आकाश बराल र निर्देशक भुसालकै लेखनमा तयार भएको हो । नरेन्द्र मैनालीले छायांकन गरेका यस फिल्मको पोस्टर डिजाइन रोयल भिमसेनले गरेका छन् । फिल्मको अन्य प्राविधिक पक्षमा, शिशिर खाती र किरण थापाले कोरियोग्राफी गरेका छन् भने द्वन्द्व निर्देशन अष्ट महर्जनको जिम्मामा रहेको छ । संगीतमा हर्कुलस बस्नेत, रोहित शाक्य र एलिस कार्की रहेका छन् भने फिल्मको सम्पादन निमेश श्रेष्ठले गरेका हुन् ।