इटहरी/ फिल्म ‘ह्रस्व दीर्घ’को नयाँ प्रदर्शन मिति सार्वजनिक भएको छ । जनैपूर्णिमा तथा रक्षाबन्धनको पावन अवसरमा यो नेपाली फिल्मको निर्माण टिमले दर्शकहरूलाई नयाँ प्रदर्शन मितिको जानकारी दिएको हो । अब यो फिल्म कार्तिक ३० गते सार्वजनिक प्रदर्शनमा आउनेछ । सुरुमा यो फिल्मको प्रदर्शन मिति असोज ११ गते तोकिएको थियो ।
पुनः एक साता अगाडि सारेर असोज ३ गतेलाई प्रदर्शन मिति तय भएको भएपनी मुम्बईमा पोस्ट प्रोडक्सन भैरहेको फिल्मका प्राविधिकहरुले अझै उत्कृष्ट बनाउनको लागी समय मागेको कारण देखाउदै प्रदर्शन मिति पोस्टपोण्ड गरिएको थियो । निर्माण पक्षले दर्शकहरूको मन जित्ने विश्वास राखेको छ । अब कार्तिक ३० गते फिल्म रिलिज भएपछि यसले कस्तो प्रभाव पार्छ भन्ने कुरा भने प्रतिक्षाको विषय बनेको छ ।
यो फिल्मलाई चन्द्र पन्तले निर्देशन गरेका हुन् । ‘ह्रस्व दीर्घ’मा नीता ढुङ्गाना, हरिहर अधिकारी, दक्षिण भारतीय कलाकार व्रह्मानन्दम, बलिउड कलाकार प्रदीप रावतसँगै बिपना थापा, गरिमा शर्मा, प्रशान्त ताम्राकार, सरोज खनाल लगायतको अभिनय रहेको छ । सामाजिक कथासहितको प्रेमकथामा आधारित यो फिल्मलाई भारतको रामोजी स्टुडियोदेखि मुम्बई, चितवन र काठमाडौँमा छायाङ्कन गरिएको छ ।
अभिनेता हरिहर अधिकारीको कथा रहेको फिल्म बलिउडका स्थापित छायांकार कविरलालको छायाङ्कन छ । फिल्ममा मित्र डि गुरुङको सम्पादन, रामजी लामिछाने कोरियोग्राफी रहेको फिल्म निता फिल्मस्को ब्यानरमा तयार भएको हो । यो फिल्मलाई निता ढुंगानाले निर्माण गरेकी हुन् । फिल्मको केही समयअघि सार्वजनिक ‘उठेर नाचिस्यो, बसेर नाचिस्यो’ गीतले छोटो समयमै लोकप्रियता कमाएको छ । जस्ले गर्दा फिल्मको हाईपमा मलजल गरेको छ । सो गीतलाई हालसम्म युट्युबमा १९ लाख भन्दा बढी पटक हेरिएको छ ।
Discussion about this post