इटहरी/ चर्चित टेलिभिजन सिरियल ‘सक्किगो नि’की लोकप्रिय पात्र मुन्नी, जसको वास्तविक नाम प्रियना आचार्य हो, अब उनी ठूला पर्दामा डेब्यु गर्न लागेकी छन् । टेलिभिजनमा मुन्नीको भूमिका निभाएर ख्याति कमाएकी प्रियना ‘लाज शरणम्’ नामक नयाँ कथानक फिल्ममार्फत आफ्नो फिल्मी अभिनेत्रीको रुपमा करियर सुरु गर्न लागेकी हुन् । उक्त फिल्म ‘सक्किगो नि’ सिरियलकै टिमले निर्माण गर्न लागेको हो ।
निर्माण कम्पनी जेपीटी क्रियसनले मुन्नीलाई फिल्ममा महत्वपूर्ण भूमिकाका लागि साइन गरेको जानकारी दिएको छ । पछिल्लो एक सातायता फिल्मका निर्माताले सामाजिक सञ्जालमार्फत कलाकारहरूको कास्टिङ लाइनअप सार्वजनिक गरिरहेका छन् । शनिबार उनीहरूले मुन्नीको कास्टिङको बारेमा जानकारी दिएका थिए ।
यो सोसल तथा कमेडी फिल्मको निर्देशन ‘जिग्री ब्रो’ नामले ख्याती कमाएका कलाकार कुमार कट्टेलले गर्नेछन् । यो फिल्म ‘लाज शरणम्’मा विजय बराल, अर्पण थापा, प्रशान्त ताम्राकार, महेश त्रिपाठी, सागर लम्साल (बले), अर्जुन घिमिरे (पाँडे), कमलमणि नेपाल, बबिन राई (गल्फने बाजे), माला लिम्बू, मुकुन्द श्रेष्ठ र देशभक्त खनालको पनि अभिनय रहनेछ ।
फिल्मको छायांकन भदौको तेस्रो सातादेखि सुरु हुने तयारीमा छ । नवीन श्रेष्ठ निर्माता तथा राम नरेश शाह सह-निर्माताको रुपमा रहने यो फिल्म फागुन १४ गते, महाशिवरात्रीको अवसरमा देशव्यापी प्रदर्शनमा आउने घोषणा गरिएको छ । प्रियना (मुन्नी) यसअघि विभिन्न म्युजिक भिडियोहरूमा पनि अभिनय गरेर ख्याती कमाईसकेकि छन् ।
Discussion about this post