मध्यपूर्व र मलेसियामा महँगो मुल्यमा बिक्री भयो पल-पुजा अभिनित फिल्म ‘रावायण’

इटहरी/ नेपाली फिल्म ‘रावायण’ आगामी भदौ २१ गतेबाट प्रदर्शनमा आउने तयारीमा छ । अहिले यसले अन्तर्राष्ट्रिय बजारमा पनि ठूलो सफलता हासिल गरेको छ । विशेषगरी फिल्म ‘रावायण’ फिल्मले मध्यपूर्व र मलेसियामा आफ्नो प्रदर्शन अधिकार ‘साथीभाइ इन्टरटेनमेन्ट’लाई महँगो मूल्यमा बिक्री गर्न सफल भएको छ । यसले फिल्मको अन्तर्राष्ट्रिय स्तरमा लोकप्रियता र चासोको समेत संकेत गरेको छ ।

हालै सार्वजनिक गरिएको फिल्मको शीर्ष गीत, पोस्टर, र टिजरले दर्शकहरूको उत्साह र फिल्मप्रति चासो र प्रतीक्षा बढेर गएको देखिन्छ । अभिनेता पल शाहको एक्सन अवतार र उनको लुक्सलाई धेरैले तारिफ गरेका छन् । यद्यपि निर्माण पक्षले अन्तर्राष्ट्रिय विक्री मूल्यको विवरण भने खुलासा गरेको छैन् ।

‘रावायण’मा प्रमुख भूमिकामा पलसंगै पूजा शर्मा, प्रियङ्का कार्की, प्रमोद अग्रहरी र निकीता चण्डक जस्ता चर्चित कलाकारहरू रहेका छन् । यो फिल्म सुदर्शन थापा प्रोडक्शन र पूजा शर्मा प्रोडक्शनको संयुक्त ब्यानरमा निर्माण गरिएको हो भने निर्मातामा पूजा शर्मा र कार्यकारी निर्मातामा सुशन पाठक रहेका छन् । नेपालमा यो चलचित्रको वितरण आरआर फिल्म्सले गर्नेछ । ‘रावायण’ले आफ्नो उत्कृष्ट कथा र बलियो कलाकारहरूको टोलीका कारण दर्शकहरूको मन जित्ने अड्कल गर्न सकिन्छ ।