इटहरी/ फिल्म‘सतीदेवी’ यहि भदौ ७ गतेबाट प्रदर्शनमा आउँदै छ र यसको प्रचारप्रसारको क्रममा रोमान्टिक गीत ‘माया बसेको रैछ’ हालै सार्वजनिक गरिएको छ । गीतमा मलिका महत र नव-अभिनेता सन्दीप बाबु लोहानीबीचको प्रेमलाई मनमोहक रूपमा प्रस्तुत गरिएको छ । गीतका शब्द लक्ष्मण सुवेदीले लेखेका हुन् भने संगीत दीपक शर्माले भरेका छन् । सार्वजनिक प्रताप दास र दीपा लामाको मधुर आवाजले यसलाई जीवन्त बनाएको छ ।
फिल्मको फर्स्ट लुक पोस्टर सार्वजनिक भएसँगै सो पोस्टरमा मलिका महतलाई कालोमोसो र जुत्ताको माला लगाएको अवस्थामा देखिएपछि दर्शकहरूको चासो बढेको थियो । अघिल्लो साता सार्वजनिक ट्रेलरले यो फिल्मप्रति थप उत्सुकता जगाएको छ । ‘सतीदेवी’ले पितृसत्तात्मक सोचलाई चुनौती दिएको छ भने विशेषगरी छोरा अनिवार्य भन्ने धारणा विरुद्ध बोल्छ । चलचित्रले समाजमा छोरीहरूको महत्त्व र योगदानलाई प्रस्ट रूपमा उजागर गर्छ । हेर्नुस् सार्वजनिक गीत ।
फिल्मका लेखक तथा निर्देशक लक्ष्मण सुवेदी हुन् । मलिका र सन्दीपसँगै रमेश बुढाथोकी, भोलाराज सापकोटा, कुलदीप अधिकारी, सृजना अधिकारी, मनिषा सापकोटा, र सुजिता सिवाकोटीको अभिनय रहेको यस चलचित्रमा बाबु श्रेष्ठको छायांकन र तारा थापा (किम्भे)को सम्पादनले उत्कृष्टता थपेको छ । ‘सतीदेवी’ले केही महत्त्वपूर्ण चलचित्र महोत्सवहरूमा अवार्ड जितिसकेको छ । जसले यसको उच्च गुणस्तरलाई प्रमाणित गर्छ ।
Discussion about this post