निश्चल बस्नेत र स्वस्तिमा खड्काको ‘दिमाग खराब’ ४० दिनसम्म (भिडियो)

इटहरी/ ६ वर्षसम्म फिल्म निर्देशनमा हात बाधेर बसेका अभिनेता तथा निर्देशक निश्चल बस्नेत पुनः निर्देशनमा फर्किएका छन् । यो बिचमा उनी अभिनयमा रमाईरहेका थिए । अब उनले ‘दिमाग खराब’ नामको फिल्म निर्देशन गर्दैछन् । यहि सोमबारदेखी काभ्रेको पाँचखालमा अवस्थित बुढानिलकण्ठ मन्दिरबाट शुभमुहर्त गर्दै फिल्मको छायांकन समेत सुरु भैसकेको छ भने फिल्ममा उनकी श्रीमती तथा अभिनेत्री स्वस्तिमा खड्कासहित खगेन्द्र लामिछाने, दयाहाङ्ग राई, अर्पण थापा र बिजय बरालको प्रमुख भूमिका रहने बताईएको छ । हेर्नुस् यो समाचारसंग सम्बन्धीत सामग्रीसहित कार्यक्रम हाईलाइट्स :

बस्नेतले यहि सालको तिहारमा अर्थात कार्तिक २४ गते प्रदर्शन गर्ने तयारी सहित ‘दिमाग खराब’को काम अगाडि बढाएका हुन् । श्रीमान श्रीमतीको रुपमा रहेका निश्चल र स्वस्तिमाले केही म्युजिक भिडियोमा सहकार्य गरेपनी फिल्ममा भने यो पहिलो सहकार्य हो । निश्चलले केहिअघि सामाजिक संजाल फेसबुकमा ‘पिपुल भर्सेस पावर’ बटमलाइन दिदै नेपाली र अङ्ग्रेजी गरि २ टाईटल पोस्टर सार्वजनिक गरेका थिए । ४० दिने छायांकन सेड्युल रहेको ‘दिमाग खराब’ लाई सुसन प्रजापतिले छायांकन गर्दैछन् भने फिल्मको पटकथा आकाश बरालले तयार गरेका हुन् । ब्ल्याक हर्स पिक्चर्स र सिनेमा आर्टको ब्यानरमा निर्माण सुरु भएको दिमाग खराबको कार्यकारी निर्माता सुरज बम ठकुरी हुन् भने रौनक बिक्रम कडेल निर्माता हुन् ।