इटहरी/ अभिनेत्री स्वस्तिमा खड्काले निर्मातामा डेब्यु गरेको फिल्म ‘बेहुली फ्रम मेघौली’ को पहिलो गीतको भिडियो सार्वजनिक भएको छ । फिल्ममा खड्का नै प्रमुख अभिनेत्रीको रुपमा रहेकी छन् । सार्वजनिक ‘उडायो मन’ गीतको भिडियोमा पनि उनी नै मुख्य रुपमा फिचर्ड भएकी छन् । डान्स बिटमा तयार गरिएको गीतको भिडियोमा उनको ठुम्का हेर्न लायक छ । उनलाई गीतमा ठुम्का हान्न सिम्रिक खड्काले समेत सघाएकी छन् भने निश्चल बस्नेतलाई सम्झेको दृश्यहरु समेत समावेश गरिएको छ । निकै नै खुशी मुद्रामा स्वस्तिमालाई गीतको भिडियोमा प्रस्तुत गरिएको छ ।
आफुले रोजेको मान्छे आउने खबरसंगै मनमा छाएको उत्साह, उमङ्ग र पर्खाईको भाव सार्वजनिक गीतको भिडियोमा स्वस्तिमाबाट झल्किन्छ । यता गीतमा थारु भाषालाई समेत मिश्रण गरिएको छ । भिडियोमा खड्का थारु पहिरनमा समेत प्रस्तुत भएकी छन् । असोज १७ गते घटस्थापनामा रिलिज हुने तय भएको ‘बेहुली फ्रम मेघौली’ फिल्मको सार्वजनिक गीत जयन जे वाईवाले लेखेका हुन् भने संगीत तथा एरेन्ज पनि उनकै हो । सार्वजनिक गीतमा इन्द्रकला राईको स्वर समावेश गरिएको छ । यो गीतको मूल सर्जक केशवराज महतो हुन् भने थारु शब्दको पुनर्लेखन अशोक थनेतले गरेका हुन् भने यो भिडियोको कोरियोग्राफी शेखर घर्ती मगरले गरेका छन् ।
ब्ल्याक हर्स पिक्चर्स र मेघौली फिल्मस्को ब्यानरमा निर्माण भएको फिल्ममा स्वस्तिमा खड्का र उनका श्रीमान् अर्थात फिल्म निर्देशक निश्चल बस्नेत निर्माताको रुपमा रहेका छन् । फिरोज खड्का र शंकर पाण्डे यो फिल्मको कार्यकारी निर्माता हुन् । ‘बेहुली फ्रम मेघौली’ फिल्ममा साजन काफ्ले र आकाश बरालको संयुक्त लेखन तथा निर्देशन रहेको छ भने दुबैले यहि फिल्मबाट निर्देशकमा डेब्यु गर्दैछन् । फिल्ममा निश्चल र स्वस्तिमाको अलवा बसुन्धरा भुषाल, बिजय बराल, सिमरन खड्का, लोकेन्द्र लेखक, रक्षा थापा, सिरु बिष्ट, आमिर गौतम, शिशिर सिवाकोटी, टीका पहारी, प्रभाकर शर्मा, लुनिभा तुलाधर, मुकुन्द मैनाली र रामबाबु रेग्मीको समेत अभिनय रहेको छ ।
Discussion about this post