बिहानैदेखी धरानमा ‘घरज्वाईं’ हेर्नेको चाप, रातीसम्मकै शोहरु भरिभराउ

इटहरी/ गएको शुक्रबारबाट प्रदर्शनमा आएको फिल्म ‘घरज्वाइँ’ले आज बुधबार धरानका अधिकांश शो हरु भरिभराउ देखिएको छ । कोशी प्रदेशको प्रमुख शहरहरु इटहरी, बिराटनगर, धरान, दमक र विर्तामोडमा शुरुआती चरणमा आक्रमक व्यापार गरेपनि पछिल्लो दिनहरुमा औसत व्यापार गरिरहेको देखिन्छ । तर, धरानको फ्रेन्ड्स सिनेमामा भने आज बुधबारका अधिकांश शोहरुमा दर्शकको चाप बिहानैदेखि देखिएको छ । हुनत यो हलमा यसअघिका दिनहरुमा पनि दर्शकको कमि भने थिएन ।

दया-मिरुनाको फिल्म प्रदर्शन भएको बेला प्रायः फ्रेन्ड्स सिनेमाज हलमा भिडभाड नै देखिन्छ । सायदै भोजपुरेहरु धरानमा छन् । कारण भोजपुरका दयाहाङ र धरानकी चेली मिरुना । यसैले पनि दर्शक यो हलमा तानिएको अनुमान लगाउन सकिन्छ, यी २ को क्रेजका कुरा त अर्को पाटोको भयो । आज बुधबार यो हलमा ‘घरज्वाईं’ लाई ४ शो दिइएको छ । बिहान १० बजे, १२:२० बजे, २:४५ बजे र ७:०५ बजे । सिनेमा हलको अनलाइन वेबसाइटबाट हेर्दा यी सबै शोमा दर्शकको चाप बिहानदेखी नै बढिरहेको छ । बेलुका ७:०५ को शो भने हामिले यो समाचार तयार गर्दैगर्दा हाउसफुलको नजिक देखिन्छ ।

जिएम मूभीज र एबीएम सिनेमा प्रोडक्सनको ब्यानरमा निर्माण भएको फिल्मलाई सुसन प्रजापतिले खिचेका हुन् । अनिल बुढा मगरको डेव्यु निर्देशनमा निर्माण भएको फिल्मलाई जनक घर्ती मगरले निर्माण गरेका हुन् । फिल्ममा दयाहाङ राई र मिरुना मगरको अलावा बुद्धि तामाङ, पुष्कर गुरुङ, शिशिर बाङ्देल, भोलाराज सापकोटा, खड्कबहादुर पुन (खबपु), राज थापा, कविता आले, शिला आले, अनु थापा, बिना थापा मगर, सोनाम लामा, बिबेश बुढा मगर, सुनिल मगरको अभिनय छ । पूर्वी रुकुम आसपासमा छायांकन गरिएको फिल्मको कथा निर्देशक अनिल आफैले लेखेका हुन् । पटकथा तथा संवाद लेखनमा भने उनलाई बिनोद खतिवडा र सुभाष कोइरालाले सघाएका छन् ।