साउन २५ गतेबाट फिल्म ‘नम्बरी सुन’, १२ जना दर्शकलाई सुन उपहार दिने घोषणा

इटहरी/ झण्डै ७० वर्ष अघि घर–घर पुगेर सुनको गहना बनाउनेको कथा प्रस्तुत गर्ने फिल्म ‘नम्बरी सुन’ निर्माण युनिटले फिल्म हेर्ने १२ जना दर्शकलाई सुन उपहार दिने घोषणा गरेको छ । यहि साउनको २५ गतेबाट सार्वजनिक प्रदर्शनमा आउने फिल्मका प्रस्तुतकर्ता नारायण खाती सुन व्यवसायी हुन् । त्यसैले पनि उनले यो घोषणा गरेका हुन् । सोमबार ललितपुरस्थित झम्सिखेलमा पत्रकार भेटघाट गर्दै यो घोषणा गरिएको हो ।

यो फिल्म ‘नम्बरी सुन’ हेर्न मोबाईल एप खल्तीबाट टिकट काट्ने मध्ये ५ जनालाई र त्यसभन्दा बाहिरबाट टिकट लिने ७ जना दर्श्कलाई लक्की ड्र मार्फत सुनको मोतीवाला चन्द्रहार उपहार स्वरुप प्रदान गरिने छ । सुनको भाउ दिनानुदिन उकालो लागीरहेको अवस्थामा फिल्म हेर्ने दर्शकका लागी यो सुनौलो अवसर बन्न सक्छ ।

फिल्म ‘नम्बरी सुन’लाई निर्देशक राजु गिरीले निर्देशन गरेका छन् । पत्रकार सम्मेलनमा बोल्दै निर्देशक गिरीले यो फिल्ममा माया प्रेम, सेन्टिमेन्टल र कमेडी मिक्स गरेर बनाईएको बताए । यस्तै फिल्मकी प्रमुख अभिनेत्री नम्रता सापकोटाले हालसम्म आफुले गरेको मध्ये नम्बरी सुन केही फरक रहेको बताईन् । प्रेम प्राप्त गर्न संघर्षरत ग्रामीण युवतीको भूमिका नम्रताले यो फिल्ममा निर्वाह गरेकी छन् ।

सुवर्ण शिभान्स प्रोडक्सनको ब्यानरमा निर्माण भएको नम्बरी सुनलाई सरोज खाती, सविन खाती र मनोज रिजालले संयुक्त निर्माण गरेका हुन् भने शिवम् अधिकारीको पटकथा तथा संवाद रहेको छ । यो फिल्ममा नम्रता सापकोटा, गौरव पहारी, सरोज खनाल, बुद्धि तामाङ, राजाराम पौडेल, किरण नेपाली, राजेन्द्र खड्गी, बिनोद न्यौपाने, सविन बाँस्तोला, गीता अधिकारी, नारायण खाती, अस्मिता न्यौपाने, राजेन्द्र गिरी, कंगना गिरी लगायतको पनि अभिनय छ ।