विराटनगरमा ‘चारदाम’को विशेष शो सम्पन्न, चलचित्र पत्रकार संघ मोरङ अध्यक्ष देवान सम्मानित

इटहरी/ तामाङ रितिरिवाज तथा संस्कृतिमा आधारित रहेर निर्माण गरिएको फिल्म ‘चारदाम’को विराटनगरमा ‘विशेष शो’ सम्पन्न भएको छ । उक्त अवसरमा चलचित्र पत्रकार संघ नेपाल, मोरङ शाखाका अध्यक्ष प्रेम देवानलाई सम्मान गरिएको छ । लामो समयदेखी विराटनगरमा रहेर चलचित्र क्षेत्रमा चलचित्र पत्रकारिताको माध्यमबाट कलम चलाएर योगदान पुर्याएको भन्दै देवानलाई सम्मान गरिएको हो ।

फिल्म निर्माण कम्पनी कोशी भिजन फिल्मस प्रालीले विराटनगर विशेष शोको अवसरको क्रममा देवान सहित कृष्ण भुषणवल प्रतिष्ठानका संरक्षक शोभा लामा वल, नेपाल तामाङ घेदुङ कोशी प्रदेश सदस्य गोवीन्द तामाङ, नेपाल तामाङ घेदुङ महानगर अध्यक्ष विष्णु कुमारी तामाङ, सस्थापक अध्यक्ष कृष्ण मोक्तान, सल्लाहकार दाव ब. घिसिङ, महानगर सचिव विजय तामाङ, कोषाध्यक्ष राम कुमार योञ्जनलाई पनि कदर पत्र र दोसल्ला ओढाएर सम्मान गरिएको थियो ।

नेपाल तामाङ घेदुङ महानगर समिति विराटनगरको समन्वयमा शनिबार विराटनगको सिटी सिनेमा हलको २ ओटै हल बुक गरेर फिल्म देखाइएको थियो । तामाङ समुदायको लोप हुन लागेको भाषा, भेषभुषा, कला संस्कृतिको संरक्षण तथा सम्बर्द्धन गर्ने उदेस्यले निर्माण गरिएको ‘चारदाम’मा सुवास योन्जन तामाङ, सुकुमाया मोक्तान तामाङ, मदन राई, मोहन लोप्चन तामाङ, शान्ति पाख्रिन तामाङ, पूर्ण लिम्बू, बालकलाकार सुम्निमा योन्जन तामाङ, डम्बर किमारी मेन्याङ्बो र मेनुका राई लगायत कलाकारको अभिनय रहेको छ ।

मोहन लोप्चन तामाङको प्रस्तुतिमा तयार भएको फिल्मलाई मैना घिसिङ, मदन बहादुर राई, पूर्ण लिम्बू, वर्षा राजभण्डारी तामाङले संयुक्त निर्माण गरेका हुन् । फिल्मको छायांकन पुर्वका भोजपुर, सुनसरीको सप्तकोशी नदि, पुर्वी मोरङ लेटाङ लगायतका विभिन्न रमणिय स्थलहरुमा छायाङकन गरिएका दृष्य फिल्म देख्न सकिन्छ । यो फिल्मले हालै विराटनगरमा सम्पन्न ‘क्यानडा नेपाल माउन्टेन फिल्म फेस्टिभल’मा ‘बेस्ट सर्ट फिल्म’को अवार्ड हात पारेको छ ।