मापदण्ड विपरीत दर्ता नभएको फिल्म प्रदर्शन हुँदै कोशी प्रदेशको नामै नराखिएको चलचित्र महोत्सवमा

इटहरी/ कोशी प्रदेश सरकारको ५० लाख बजेटमा दुई तर्फी रुपमा यतिबेला ‘चलचित्र महोत्सव-२०८१’ आयोजना भैरहेको छ । एकातर्फ केवल तामाङ नेतृत्वको ‘चलचित्रकर्मी संघ’को व्यवस्थापनमा र अर्को तर्फ अरुण कुमार प्रधानको ‘नेपाल चलचित्रकर्मी महासंघ’को व्यवस्थापनमा । आयोजक भने कोशी प्रदेश अन्तर्गतको आन्तरिक मामिला तथा कानुन मन्त्रालय नै हो । यतिबेला मन्त्रालयले तोकेको समयअवधीमा दर्ता नभएको फिल्म प्रदर्शन हुने सेड्युल सार्वजनिक हुँदा महोत्सवको औचित्य र महोत्सवले कस्तो भाष्य स्थापित गर्ला भन्ने प्रश्न खडा भएको छ ।

विभिन्न प्रतिष्ठित फिल्म फेस्टिभल तथा अवार्डमा अब्बल सावित भएको फिल्म ‘ऎना झ्यालको पुतली’ उक्त महोत्सव अन्तर्गत नि:शुल्क प्रदर्शन हुने भएको छ । एउटा आसलाग्दो फिल्म प्रदर्शन हुनु आपत्ती हैन । तर यो फिल्म निर्माण भएको झण्डै ४ वर्षअघि हो । कोरोना महामारी र अन्य प्राविधिक कारणले यो फिल्म ‘ऎना झ्यालको पुतली’ को प्रदर्शन रोकिएको थियो । जवकी यो महोत्सवमा २०७९ र ८० सालमा कोशी प्रदेशमा बनेका र यहाँका चलचित्रकर्मीले निर्माण गरेको फिल्मलाई लिइने भनिएको थियो । तर, प्रदर्शन भनेर त्यहाँ उल्लेख गरिएको छैन । यसरी हेर्दा तोकिएको मापदण्डमा प्रदर्शनका हिसाबले योग्य भएपनी निर्माणका हिसाबले भने योग्य देखिदैन ।

यसरी दर्ता अवधी सकिएर महोत्सव सुरु भैसक्दा पनि फिल्महरु थपिदै जानु र मापदण्ड विपरीत फिल्महरु लिइनुले भने आयोजक वा व्यवस्थापकको कमजोरी प्रष्टै देखिन्छ । सायदै चलचित्र महोत्सवमा यस्तो हुँदैन । दर्ताको समय अवधी सकिएपछि पनि यसरी फिल्म थपिनुथियो भने एउटा निर्धारित समय किन सरकारी निकायबाट तोकियो ? यता सो महोत्सवको भने कुनै नाम नै छैन । सिधा रुपमा भन्दा उक्त महोत्सव बेनामी महोत्सवको रुपमा देखिएको छ, जस्को अस्तित्व के भन्ने प्रश्न खडा हुन्छ ।

यसबारेमा बिस्तृत समाचार यसअघि नै परिकला न्युज डटकममा प्रकाशित गरिसकेका छौं । महोत्सवको पनि एक किसिमको नीति नियम पक्कै हुन्छ । तर, कोशी प्रदेशमा पहिलो पटक सरकारी तवरबाट भैरहेको चलचित्र महोत्सवको नीति नियम भने अन्यौल र मनपरि देखिएको छ । कोशी प्रदेश सरकारले महोत्सव सुरु हुनुभन्दा अगाडि चलचित्र दर्ताको लागी एकहप्ते सुचना आव्हान गरेको थियो । जहाँ ४७ ओटा फिल्म दर्ता भएको भनिएको थियो । तर, एउटै फिल्म ‘युप्पारुङ पि:मा’ ३ चोटि र अर्को फिल्म ‘घुम्टन’ २ चोटि दर्ता भएको परिकला न्युजले प्राप्त गरेको थियो ।