‘कोशी चलचित्र महोत्सव’मा ४४ ओटा फिल्म दर्ता, छक्का पन्जा ४ देखी गोर्खा वारियरसम्म

इटहरी/ कोशी प्रदेशमा आयोजना हुन लागेको बृहत् ‘कोशी चलचित्र महोत्सव २०८१’ का लागी ४४ ओटा छोटो तथा लामो चलचित्र दर्ता भएको छ । यहि जेठको ६ गतेदेखी ५ दिनसम्म चल्ने महोत्सवलाई कोशी प्रदेश सरकारको आन्तरिक मामिला तथा कानुन मन्त्रालय अन्तर्गतको सुचना शाखाले आयोजना गर्दैछ । प्रदेश सरकारबाट यो महोत्सव आयोजना गर्नलाई ५० लाख बजेट छुट्याइएको छ । महोत्सवलाई बृहत् बनाउन मन्त्रालयले कोशी प्रदेशमा स्थापना भएको केवल तामाङ नेतृत्वको चलचित्रकर्मी संघ र अरुण कुमार प्रधान नेतृत्वको नेपाल चलचित्रकर्मी महासंघलाई सहआयोजकको रुपमा राखेको छ ।

मन्त्रालयले एकसाता अघि सार्वजनिक सुचना नै जारी गरेर यस महोत्सवका लागी कोशी प्रदेशमा बनेका चलचित्र दर्ताको आव्हान गरेको थियो । यहि बैशाख २७ गतेसम्म चलचित्र दर्ताको लागी म्याद तोकिएको थियो । तर, मन्त्रालयका सूचना शाखा प्रमुख नारायण भन्डारीका अनुसार प्रतियोगी फिल्मका लागी दर्ता गर्ने म्याद सकिएपनी अप्रतियोगी अर्थात प्रदर्शन मात्रै गर्न चाहने छोटो तथा लामो चलचित्र निर्माण युनिटले भने अझै मन्त्रालयमा नाम टिपाउन सकिने बताए ।

प्रतियोगि फिल्मका लागी दर्ता भएका फिल्महरुमा सुपरहिट भएको ‘छक्का पन्जा-४’ देखी ऎतिहासिक रेकर्डहरु कायम गरेको ‘गोर्खा वारियर’ फिल्मसम्म रहेका छन् । मन्त्रालयले प्रकाशित गरेको सुचनामा २०७९ र २०८० मा निर्माण भएको र कोशी प्रदेशमा बनेको नेपाली, आदिवासी जनजाति, मैथिलीसंगै कोशी प्रदेशका राष्ट्रिय तथा मातृ भाषामा बनेका फिचर, सर्ट फिल्म वा वृतचित्रले सहभागी जनाउन पाउने भनेको थियो । यता राष्ट्रिय फिचर फिल्मको हकमा भने फिल्मको निर्माता तथा निर्देशक, चलचित्रको मुख्य कलाकार तथा चलचित्र निर्माण गर्ने कम्पनी कोशी प्रदेशको हुनुपर्नेसंगै फिल्मको ४० प्रतिशत छायांकन कोशी प्रदेशमा भएको हुनुपर्ने मापदण्ड तोकिएको थियो ।

त्यसै अनुरुप फिल्म छक्का पन्जा ४ र गोर्खा वारियरसंगै नालापानी, कृष्णलिला, बिहेपास, विछेद, काँडेतार, वानर सेना, थिम, रित, लुंङा, नि-पुग्याल, अभियान, हाम्रो जङ्गल, तु हमर जान हौ, सेमिफुङ, माङेना, घुम्टन, चारदाम, युप्पारुङ, हाङ्नान्द, लिलामे माईला, सिमे:वा, युक्पुङ (बस्ती), जमान-३, रातो जुन, जब प्रकाश जान्छ, आईसक्रीम, द रेड मुन, फु, नागा, मोख, माता, अदेख, चिना, जिउ पैँचो, के २, बाध्यता, कुमाक्ला फाक, खोक्पा, समयके खेला, धैर्य, बेङ्ठा, लौलसा परहके जस्ता लामो तथा छोटो फिल्महरु दर्ता भएका छन् । परिकला न्युजलाई प्राप्त डाटा अनुसार ‘युप्पारुङ पि:मा’ फिल्म ३ चोटीसम्म दर्ता भएको पायौ । दर्ता नम्बर ४१५९, ४१३१ र ४१५१ मा यो फिल्म दर्ता भएको छ भने अर्को फिल्म ‘घुम्टन’ दर्ता नम्बर ४११० र ४१४४ मा गरि २ पटक दर्ता गरिएको छ । अन्य सबै फिल्म एक-एक पटक दर्ता भैरहदा सायदै यो दर्ताहरु नियमबद्ध हुन सक्दैन । कहि कतै प्राविधिक त्रुटि भएको हुनसक्छ । जे होस् यो उल्लेख्य सहभागीताले ‘कोशी चलचित्र महोत्सव-२०८१’ सफल हुने संकेत गरेको छ ।